قطة جديدة - Cat - Petsoholicقررت تجيب قطة جديدة؟ طيب تستعد ازاي؟ و ايه الحجات الهتحتاج تجيبها قبل ما تيجي البيت؟

انك تجيب قطة جديدة البيت، بالذات لو بقالك فترة نفسك فيها و بتخططلها…بتبقا فترة حلوة جداً بالنسبة لنا…لكن بالنسبة للقط أو القطة الجديدة، بتكون فترة صعبة و مخيفة جداً مهما كان سنها، لأنها فجأة بتسيب أمها و أخوتها، و البيت و المربي و الروائح المعتادة عليها، و فجأة بتلاقي نفسها في مكان جديد مع ناس جديدة و كل حاجة مختلفة
و مع الاختلاف حسب شخصية كل قط أو قطة؛ ففي قطط بتتعود بسرعة و قطط بتحتاج وقت أطول لتتأقلم مع الوضع الجديد… عشان كدا لازم نراعي دا جداً في تعاملنا معهم، و لو عندك أطفال بالبيت لازم تتفق معهم و تعلمهم يكونوا هادئين في التعامل بالذات في أول اسبوع إلى اسبوعين من استقبال القطة

 

  استعد من بدري، و متستناش ليوم ما تجيب القطة عشان تجهز البيت و تجيب لوازمها؛

:تأمين البيت للقطة

بعض النباتات سامة للقطط، فلو عندك نباتات في البيت، تأكد انها غير ضارة للقطط و ابعد أي نباتات مضرة من أي مكان القطة ممكن توصله 

،لو عندك حجات ثمينة ممكن تتكسر، ارفعها في مكان عالي مؤقتاً لحد ما تفهم شخصية و طبيعة قطتك الجديدة، و كمان لحد ما القطة تحفظ البيت و تتعود عليه 
منعا لأي حوادث ممكن تحصل، زي التعامل ما بنتعامل مع الأطفال بالضبط

.متسبش أي كبس في فيشة الكهربة و خلي بالك من الأسلاك – لأن القطط الصغيرة بالذات ممكن تلعب أو تعض في السلك و تتكهرب 

اغلق النوافذ – لأن معظم القطط بتحب تتفرج من الشباك، لكن لو القطة لسة صغيرة أو مبتعرفش تتحكم كويس في نفسها، أو  لسة متطمنتش للبيت و اتخضت 
.مثلاً من حاجة فجأة ممكن تجري و تنط أو تقع من الشباك. فا دائماً اغلق النوافذ، و متسبهاش لوحدها في البلكونة لحد ما تحس انها مستعدة أو مفيش خطر عليها

متسبش أي حاجة حادة زي السكاكين و المقصات و غيرها، أو أشياء صغيرة ممكن القطة تبلعها بالغلط و هي بتلعب  في أماكن القطة تقدر 
.توصلها عشان متئذيش نفسها

 

:صندوق نقل القطةقطة جديدة - cat carrier - Petsoholic

هتحتاج الصندوق كثير. أولاً لنقل القطة البيت لأول مرة، و بعدها هتحتاجة كثير في زيارات الطبيب البيطري، و في أي وقت هتحتاج تنقل القطة أو تاخدها معك لأي مكان. فاختار نوع كويس يستحمل الوزن، و حجمة مناسب لحجم قطتك لحد ما تكبر. و يكون حمول عشان يعيش معك. و كمان يُفضّل تحط في الصندوق ملاية صغيرة طرية لراحة القط

 

:أطباق الأكل و المياه

:اسأل المربي عن أنواع الأكل ال-القطة متعودة عليه 

مهم جداً في الفترة الأوللى بالتحديد انك تعرف هي متعودة على ايه، حتى و لو كان الأكل المتعودة عليه غير صحي لها. بس لو فجأة غيرت نظامها الغذائي ممكن يحصلها مشاكل هضمية و يجلها اسهال. عشان كدا أفضل انك تحطلها الأكل الكانت متعودة عليه في الفترة الأولى، و تبدأ تدريجياً تغيره أو تضيف عليه واحده واحده
و طبعاً مهم جداً تعرف ان القطط  صعب ارضاءها و تعودها على الأكل بسهولة. فا كل ما هتعودها على أنواع الأكل المختلفة من و هي صغيرة، كل ما هيسهل عليك حجات كثير قدام

خلي بالك – استخدام الأكل الناشف كوجبة أساسية للقطط ضار جدااااً، و هشرحلكم أكثر بالتفصيل في موضوع آخر لما نتكل عن النظام الغذائي الصحيح للقطط

 

قطة جديدة - Food bowl - Petsoholic:أطباق الأكل و المياه

تجنب الأطباق البلاستيك – أنا عارفة ان معظم أطباق أكل القطط البنشفها في المحلات هي البلاستيك، و بنجبهم لأنهم عمليين و مش بيتكسروا بسهولة.  بس للأسف دا مش أحسن اختيار خاااالص لأسباب كثير؛ فبعض القطط عندها حساسية من البلاستيك، و مع الوقت ممكن يتسبب في ظهور مشكلة جلدية حول منطقة الفم، حاجة شبه الحبوب أو الدمل بتظهر حول الفم و الذقن و الشفة. دا طبعاً غير ان البلاستيك بصفة عامة عنده قابلية عالية لتكوين الباكتيريا مع الوقت حتى مع التنظيف الجيد، و البتكون مضرة جداا عليهم. كمان لو سخنت الأكل فيه بيتفاعل مع الأكل و ممكن يسبب سرطانات و العياذ بالله للإنسان و الحيوان. و غير طبعاً ان بصفة عامة البلاستيك مضر جداً للبيئة و لو اتكلمنا عن أضراره هيحتاج موضوع كامل لوحده

أفضل أنواع أطباق للحيوانات الأليفة، حسب ما نصح به الأطباء البيطرين هم؛ الستانليس و السيراميك، لكن من وجهة نظري الشخصية فالستانليس عملي أكثر لأنه حمول، و ميتكسرش زي السيراميك. و كمان تنظيفه  و سهل و مش مكلف

 

:عدد الأطباق 

القطط لا تحب المشاركة مع القطط الأخرى. فلو عندك أكثر من قطة، لازم كل قط يكون له طبق أكل و طبق مياه خاص به. و إلا بتزيد العصبية و الخناق بينهم

 

:متقدمش الأكل في طبق مش نظيف 

القطط بطبيعتها حيوان نظيف و انف جداً، فا متحطش الأكل للقطة في طبق مش نظيف. لأن الباكتيريا و الجراثيم الموجودة بالطبق هتئذي القط. الطبق المتقدرش تاكل انت فيه، متحطوش للحيوان
و يفضل غسل الأطباق بالماء و الخل و الملح بدل صابون الأطباق الا في الاضطرار. لأن الصابون بيترك بقايا كيماوية مضرة. فيفضل استبدالها بالخل البيقتل الباكتيريا و الجراثيم بطريقة طبيعية و آمنة

 

:صندوق الفضلات، الفرش (الرمل)، و الجاروف

متنساش مهم جداً  تجيب طبق الفضلات، و الفرش و الجاروف المخصصو تحدد المكان الهتحط فيه الصندوق  قبل ما تيجي القطة. لأن أول شئ لازم تعمله أول ما القطة تدخل البيت هو؛ انك تخليها تشوف و تشم طبق الرمل هشان تعرف مكانه و بالتالي يكون أسهل كثير تدريبها عليه

 

قطة جديدة - litter essentials - Petsoholic:صندوق الفضلات 

طبعاً أنواع و أشكال الصناديق مختلفة، و لازم تختار الشكل و الحجم المناسب لك و لقطك
،لكن، القاعدة العامة هي؛ ان عدد أطباق الفضلات يكون ضعف عدد القطط في المكان
بمعنى؛ ان لكل 1 قط = طبقين
 بالذات لو البيت كبير، و يتفرقوا بأماكن بعيدة عن بعض. لكن لو بيتك مساحتة صغيرة فطبق واحد يكفي لكل قط
أهم شئ ان كل قط بالبيت يكون عنده طبق فضلات خاص به، لأن طبق الفضلات بالنسبة للقطط هو أكثر من مجرد مكان الحمام بتاعه. و هشرحلكم الموضوع كمان في مقال خاص عن طرق تدريب القطط الصحيحة لإستخدام طبق الفضلات و ايه هي الحجات الممكن تخلي القط فجأة يقرر يبطل يستخدمه

 

:حجم صندوق الفضلات 

حجم الصندوق لازم يكون مناسب لحجم قطك و هو بالغ. عشان يعيش معاه و متضطرش تجيب واحد جديد لما القط يكبر
لازم الطبق يكون كبير كفاية بحيث ان القط يكون عنده مساحة كافية للحركة و الحفر فيه. و كمان لازم تراعي انه يكون سهل على القط الدخول و الخروج منه
فمثلاً لو عندك قطة صغيرة، أو قطة سنها كبير، أو قطة عندها مشاكل في المفاصل أو مشاكل صحية معينة، لازم تراعي انك تجيب طبق مدخلة واطي للأرض بحيث انك تسهل على القط

 

قطة جديدة - Cats Litter - Petsoholic:الفرش/الرمل 

 أنواع الفرش كثير و مختلفة، ففي أنواع كلامبينج، و كريستال، و أنواع مصنعة من الورق المعاد تصنيعة و غيرهم الكثير. و في الحقيقة، انه بشكل عام اختيار النوع المفضل يرجع لتفضيلك الشخصي انت و القط بتاعك،  ولكن في  ۳ نقاط أساسية يجب مراعتها، و هي؛

أ.  ممنوع تماماً استخدام رمل الشارع لقطط البيت لأسباب كثير جداً، و أهمها؛
 ان رمل الشارع مش بيكون نظيف، بمعنى انه بيكون حامل لجراثيم و أمراض ممكن تئذي قطك و تئذيك انت كمان. دا غير طبعاً انك هتواجه مشكلة كبيرة مع الريحة  و التنظيف و الرمل البيلزق في رجلين القطط… فا موضوع رملة الشارع ممنوع تماماً استخدامه داخل البيوت

.ب.  معظم القطط بتفضل الفرش بدون روائح اضافية، زي الأنواع البرائحة الليمون و الفراولة و غيرها. بالأخص لو القط عنده هيمنة عليا

ج. لو القط كان عايش عند حد ثاني قبل ما يجيلك، و متعود على نوع فرش معين، فيفضل استخدام نفس النوع الهو متعود عليه. و لو قطك متعود على نوع معين من الفرش، بلاش تغيره كل شوية الا لو حسيت ان قطك مرتاح أكثر للنوع الجديد. و طبعاً “بنوع” مقصدش نوع البراند بتاعه، أقصد نوع و حجم الفرش نفسه

 

قطة جديدة - Bad smelly litterbox:تنظيف الطبق أو الصنوق باستمرار 

مهم جداً جداً جداً تنظيف الطبق يومياً. و لو بتستخدم الأدوات الصح فعملية التنظيف هتكون سهلة بمجرد انك تشيل الحجات الفي الطبق بالجاروف و تترك باقي الرمل زي ما هو.. لازم تعرف ان القطط بتكره الريحة الكريهة و لو تركت الطبق مش نظيف ممكن تعمل خارجه كسلوك اعتراضي… دا غير ان الرائحة بتكون كريهة جداً و القط لما بيدخل الطبق و يدوس على الحجات بتعته و بعد كدا ينطلق داخل البيت… فبلاش تهمل في تنظيفه

 

? :مفيش حاجة بتستخبا… فمتخبيش الطبق 

.تحديد مكان صندوف الفضلات مهم جداً في تشجيع أو تكريه القط على استخدامه
قطة جديدة - My Litterbox_Petsoholicفمينفعش تحطة في آخر البيت، ولا تحت الكنبة، ولا في أي مكان مهجور أو صعب على القطة الوصول له، لأن القطط مبتحبش الخصوصية الزائدة فيما يتعلق بقيام حاجتها. و مع  الوقت ممكن تكسل تستخدمه و تستسهل أماكن ثانية في البيت
الطبق لازم يكون في مكان معيشة. ممكن في الحمام لكن في مكان واضح، أو في المطبخ مثلاً، أو أي مكان تحبه بس يكون سهل الوصول له. و بالنسبة لموضوع الريحة فلو الطبق بينظف باستمرار زي ما اتفقنا، و القط أكله صحي، فمش هتواجه أي مشكله مع الريحة. و كمان دلوقتي أصبح في أنواع أطباق بغطاء بلاستيك  و به فتحة لدخول و خروج القط بسهولة زي الفي الصورة دي.. أنا شخصيا برجح النوع دا من الأطباق جدا لأنك مش بتشوف الحجات و لا بتشم ريحة إلا لة ريحة قوية بسبب عدم تنظيف الطبق، و دا النوع الأنا شخصياً بستخدمة مع قطتي

  ?…القطط لا تقدر الخصوصية فيما يتعلق بقضاء حاجتها

 

قطة جديدة - Hugzy - Scratch house - Petsoholic

:عمود خدش

.الخدش فطرة في القطط، و مهم جداً بالنسبة لهم و فوائدة كثيرة. فمهما حاربت و زعقت.. للأسف مضطرة اقولك ان قطك هيفضل يخربش
عشان كدا لازم تجيب عمود أو سجادة خدش.. و ممكن بسهولة تصنعة بنفسك لو مش حابب تشتري بحجات بسيطة جداً، المهم انه لازم يتواجد، عشان طريقة تدريب القطط الصح هي طريقة اسمها؛
The YES & NO training method
يعني بتدربها ان الخدش ممنوع هنا بس مسموح هنا. و يتم وضعه بالضبط جنب المكان الهتلاحظ انها دائماً بتخربش فيه، والعادتاً بيكون أكثر مكان انت بتعد فيه في البيت، و دا البنسميه تعديل السلوك
راقب قطك و اعرف هو/هي بتحب تخربش في حجات أفقية ولا عمودية، و ايه نوعية الحجات البتخربش فيها يعني قماش مثلاً ولا خشب ولا ورق الحيطة و غيره،  و على الأساس دا تجبلها أو تعملها مكان الخدش المناسب لها
و بشكل شخصي أنا بفضل بيت الخدش الكبير مثل الصورة أمامكم، لأنه بيعطي القطة مساحة انها تخربش و تلعب بأشياء و أحجام و اتجاهات مختلفة، دا غير ان القطة بتستمتع به جدا و بتحس ان لها مكان خصوصي آمن و بتعها هي بس

 

 

:أدوات التقليم

  :هتحتاج؛ فرشة، و مشط قطط، و قصافة أظافر

أ.  تسريح أو تمشيط شعر القطة باستمرار مهم جداً جداً لأنه بينشط الدورة الدموية في جسمهم، و بيحمي شعرهم من التعقيد و التكتل، و بيقلل وقوع شعر القطة
و انتشاره في كل مكان
 ?و طبعا أي حد عنده قطة أكيد عارف مأساة انتشار الشعر و بالأخص على هدومك أكيد الموضوع غني عن التعريف
!دا غير كمان انه بينشط الدورة الدموية في جسمهم و معظم القطط بتستمع جدا بانك تمشطها… بس مهم تعودها من و هي صغيرة

قطة جديدة - cat nail - petsoholic

ب.  قص ظوافر القطط الأمامية في اليدين مهم كمان للقطط البتتربى داخل البيت. بس خلي بالك ان لو قطك بيطلع بره البيت مينفعش تقصله ظوافره لأنها وسيلة دفاع عن النفس و بتحميه من حجات كثير
و بلاش تقص ظوافر القط بنفسك غير لو عندك خبرة كافية، عشان ظوافرهم مش زينا.. ظفر القط بداخلة جزء زي لحمة فيها أوعية دموية، فلو قصيته أكثر من اللازم ممكن تعوره

:ملحوظة مهمة

 أ.  في ناس بتهمل في قص الأظافر متخيلة انه أفضل تترك القط على طبيعته زي ما خلقه ربنا. و دا فعلاً حقيقي في حالة ان القط يكون بيخرج برة البيت. لكن لو القط مش بيطلع بره، فا قص الأظافر مهم جداً لأن الظفر ممكن يطول أكثر من اللازم و يوجع القط جدا و ممكن يسببله تشوهات مع الوقت
ًب.  قص أظافر القطط مش بيقلل من الخربشة، لأن الخربشة دي سلوك فطري في القطط و له أسباب كثير زي ما حكينا من شوية. لكن قص الظفر طبعا بيقلل منها لأن القطة بتكون مرتاحة و مش محتاجة تخربش الا لو للفت الانتباه. و بردو لما بتخربش الأظافر مبتكنش حادة و بالتالي مبتنتش الحاجة أو تخربها

 

  قطة جديدة - Playful cat - Petsoholic:اللِعَب

تحتاج القطط لتدريب يومي عشان تطلع الطاقة الجواها. الطاقة دي عادتاً في الطبيعة بتطلع عن طريق الصيد و غيره. و بتفرق مدة التدريب حسب نوع القطة أو سلالتها
ناس كثير بتشتكي من عنف قطتها، و مش عرفين ان من أهم المسببات للعنف في القطط هي عدم تحفيزهم أو اللعب معهم. بالضبط زي الطفل ال-لو مخرجش الطاقة الجواه بيبدأ يسرخ و يتنطط في كل حته في البيت
.و استخدام اللعب هي طريقة من الطرق البتحفذهم جسدياً و عقلياً
وكمان بتزيد أهميتها لو انت شخص بيشتغل كثير أو مبتعدش كثير في البيت، فا بالتالي انت محتاج تعوض وجودك بألعاب مختلفة عشان القطة متزهقش أو يجلها اكتئاب، و الممكن مع الوقت يقلب لعنف

 

 

قطة جديدة - petmd-cat-fighting - petsoholic:طيب لو عندك حيوان ثاني، ازاي هتعرفهم على بعض

لو عندك حيوان ثاني سواء كان قط، أو حيوان آخر. مينفعش فجأة تواجهم ببعض و إلا التعارف ممكن يحصل فيه مشاكل كثير. و دي غلطة بنقع فيها كثير. لازم الموضوع يكون تدريجي، و لازم القط أو القطة الجديدة تتأقلم بالبيت و تبدأ تطمنلك وتثق فيك أولاً، بعد كدا تبدأ تعرفها بالحيوانات الأخرى  بطريقة معينة هنتحدث فيها بالتفصيل و بالخطوات في موضوع آخر انشاء الله

و كمان لازم تطمن على صحة القط الجديد، و تتأكد انه أخد كل تطعيماته قبل ما تدخله مع باقي الحيوانات العندك، عشان لو عنده أي مشاكل صحية ميعديش الباقي
و دا الهيجبنا للنقطة البعدها، و هي؛

 

 

قطة جديدة - Vet icon - Petsoholic:زيارة الطبيب البيطري

أياً كان عمر القط الجديد، لازم قبل ما تستقبله بالبيت تسأل الشخص الهتاخده منه لو اخد التطعيمات ولا لأ. و لازم توديه للطبيب عشان تتأكد ان كل حاجة تمام و تسأل و تفهم من الدكتور كل حاجة عن التطعيمات اللازمة و أسبابها و كل حاجة محتاج  تعرفها. و لو مش ناوي تجوز القط أو القطة فكمان هتحتاج تسأل عن عمليات التعقيم و غيره

 

:و أخيراً

متستعجلش، متخدش الأمور بسرعة و متعنفش أو تجبرالقط الجديد على شئ. خد الموضوع تدريجي و بالراحة و علم قطك ازاي يثق فيك.  لو  القط حابب يكون لوحده سيبه، و لو مش حابب انك تشيله دلوقتي متمسكوش بالعافية، و متسمحش لأي حد يدايقة و دائماً احميه  و افهم طباعه و اقرأ كثير
معظم القطط الصغيرة بتتعود بسرعة على المكان و الصاحب الجديد. لكن كل ما عمر القطة بيكون أكبر كل ما في الغالب بتاخد وقت أكبر نسبياً عشان تتعود عليك. بالذات لو كانت مرت بتجارب سيئة من العنف و الاهمال أو التدريب الخطأ في السابق،  فهتحتاج منك وقت و مساحة كافية لحد ما تتطمنلك انك شخص جدير بالثقة

:هحكيلكم قصة طريفة و قصيرة

حصلت مع قريب لي بسبب انه محاولش يقرأ او يتعلم أي شئ عن القطط قبل ما يجيب قطته و اعتمد على كلام الحواليه فقط
كان القط عمره حوالي 3 أشهر، و القط حبه جداً و صاحبه، بس كل يوم في وقت معين بييجي قريبي يقرب منه يطلع القط يجري! مع ان القط كان بيحبه جدا. فا اتصل بي و كان متغاظ جداً، بيسألني ليه دا بيحصل؟ هو كان متخيل ان القط بيجري عشان خايف منه، فسألته شوية أسئلة و في الآخر  قلتله على فكرة.. هو مش بيجري منك هو بيلعب معك و عيزك تجري وراه
? بعد ما قفلنا المكالمة بعتلي قالي ان القط طلع فعلا عايز يلعب معاه.
فا شوفو قد ايه مهم نفهم الحيوان البنربيه حتى في أبسط الأمور، فما بالكم بقا في الأمور المتعلقة بصحة و سلامة الحيوان؟

 

 ،أتمنى أكون قدرت أفيدكم… لو عندك أي أسئلة، متترددش انك تبعتلي و أنا هحاول دائماً أرد على كل الأسئلة… هتلاقوني دائماً موجودة للرد على تعليقاتكم هنا، أو لو محتاجين رد لحظي ابعتولي على صفحة الفيسبوك أو انستجرام الصفحة العربية أو الانجليزية
و لو حابب يوصلك كل مقال جديد، اضف بيردك الالكتروني و انضم لنا  أو تابعني  على  بينتريست و اينستجرام؛

:ربما يعجبك أيضاً

كيف تختار الحيوان الأليف المناسب لك؟
Why should you never feed your cat a Dry Food ONLY diet?
What happens if a kitten is separated too early from its mama?
How to litter box train your cat or kitten?
11 things to consider before choosing your First Pet

 

 

 

 

UA-86615504-1