Categories
Home طيور

تربية و رعاية طائر البادجي

معلومات أساسية

.البادجيريجار. معروف باسم؛ البادجي، طيور الحب، أو الاسترالي
.(Melopsittacus Undulatus) الاسم العلمي: ميلوبسيتاكوس وندولاتوس
.الموطن الأصلي: قارة أستراليا
.الحجم: يتراوح بين 15 إلى 20 سم
.متوسط العمر: 6 – 10 أعوام

هل تعلم؟

  أكثر بادجي عاش في العالم حسب ما رصدت “جينيس ريكورد” كان اسمه “شارلي” عاش في انجلترا و بلغ من العمر 29 عام

طيب، ايه هو البادجي؟

البادجي أو الاسترالي هو؛ أصغر نوع من أنواع الببغاوات. و مثل باقي الببغاوات. فمنقاره منحني، و بيكون المنقار العلوي أطول قليلاً من السفلي، و القدم بها 4 أصابع؛ 2 للأمام و 2 للخلف

.و هو من أشهر أنواع الطيور البيربيها الإنسان كحيوان أليف، تماماَ بعد القطط و الكلاب
بسبب طبيعته الإجتماعية، صغر حجمة، و سهولة تربيته و تزاوجه البيخليه دائماً متاح بمحلات الحيوانات الأليفة  بأسعار بسيطة. الحاجة البتخلي ناس كثير تشتريه بإندفاع، بعد ما تسأل البائعين كام سؤال، ال-للأسف بيتعامل معظمهم مع الحيوانات كمجرد سلعة للتجارة، مش روح أو مخلوقات لها حق و احتياجات خاصة، وللأسف معظم معلوماتهم بتكون غلط. فبيشتري الطائر بدون ما يعرف أي شيء عن طريقة تربيته الصحيحة.. وهوب جبنا البادجي! حبسناه في قفص صغير، بشوية حبوب و مياه
و طبعاً بعد فترة بيزيد توتر الطائر و توتر صاحبة بسبب الرعاية الخاطئة، و يبدأ يكتشف انه غير قادر على متابعة احتياجاته، فيوديه لحد ثاني يرعاه، أو يفتحله باب القفص “عشان يطير” و دا طبعاً خطأ و ظلم أكبر للطائر،  لأن اللأسف بهذه الطريقة هو بيقتل الطائر قتل غير رحيم، فيا بيموت بسبب عدم قدرته لجلب الطعام و الشراب،  يا بيدخل بلكونة شخص آخر، و لو كان رحيم كفاية بيدخله البيت ليرعاه.
عشان كدا مهم جداً جداً تقرأ و تتعلم في الأماكن الصحيحة قبل شراء أي حيوان أليف

أسوأ حاجة ممكن تعملها لأي حيوان هي انك تاخد معلومات من التجار… على عكس المفروض انهم أكثر ناس على دراية بس للأسف في بلادنا دا مش الوضع لأن معظم التجار (إلا من رحم ربي) حافظين بعض التعليمات الخاطئة تماماً و بيكرروها للناس و إحنا بناخد منهم التعليمات على أساس انهم على دراية و علم و هي معلومات غلط و مؤذية

:مواصفات البادجي

.ببغاء صغير، اجتماعي  و ذكي جداً. قادر على تقليد الأصوات و بعض الكلمات، لو اهتميت بتدريبه بالطريقة الصحيحة
.و عادتاً بيكون الذكر اجتماعي أكثر من الأنثى و قدراته الصوتيه أقوى بكثير

و البادجي طائر رومانسي جداً فهو من الطيور “أحادية الزواج” يعني بيرتبط بزوجته مدى الحياة. و ارتباطة بأفراد سربة قوي جداً. فعندما يرتبط طائرين ببعض لا يجوز تفرقتهم أبداً لأنهم بيصابوا باكتئاب، و لا ينصح تماماً انك تربي طائر واحد لوحده

البادجي طائر مسالم جداً، و الطيور بصفة عامة معندهاش سيطرة أو  ترتيب قيادي للسرب، كلهم زي بعض، و لكن ممكن يحدث خلافات بين أفراد السرب قد تؤدي لموت أحدهم في بعض الحلات؛
.للأناث: في حالة (وجود عش واحد) و أكثر من أنثى في حالة استعداد للزواج أو هتبيض
الذكور: في حالة وجود أنثى واحدة و أكثر من ذكرجاهز -(في وجود العش. و أحياناً بيحصل مشاكل عنف في حالة صغر حجم القفص على عدد الطيور أياً كان النوع

:أنواع البادجي

Australian Budgie Vs English Budgie - Petsoholic

أنواع  أو مسميات البادجي كثيرة، و بترجع لحسب بلد المنشأ

أو المربي، و حسب اللون و الطفرة، و لكن بصفة عامة، في نوعين أساسيين من البادجي، هم؛ البادجي الأسترالي و البادجي الانجليزي. و أكبر فرق بيميز الاثنين عن بعض هو؛ فرق الحجم.. فحجم البادجي الانجليزي بيكون أكبر من الاسترالي مرتين لثلاثة

و الألوان الأساسية للبادجي البري الأسترالي هم الأصفر و الأخضر، ولكن بعد ما بدأ الانسان في ترويض الببغاء و  تربيتة و تزاوجة بدأت تظهر كل  الألوان و الطفرات المختلفة الرائعة من كل الألوان الأخرى. و حتى هذا اليوم، فالألوان الموجودة بالأسراب البرية بأستراليا هم الأصفر و الأخضر فقط

:نوع ريش الكوكاتيل

الريش البودرة؛ من الجدير بالذكر ان هذا النوه من الريش يمكن أن يكون غير مناسب للأشخاص الذين يعانون من حساسية في الصدر

ازاي تختار الطائر و تتأكد من سلامته؟

يفضل دائماً لما تيجي تشتري أي طائر انك تدور أولاً على مربي غير تجاري أولاً، عشان تكون عندك خلفية أفضل عن الطائر و صحته. بالأخص لو انت مبتدئ أو بتربي طيور لأول مرة

:اهتم بالتفاصيل

اختار زغلول (صغير) مفطوم

فكل ما يتربى الطائر و يتعود عليك في سن صغير هيكون أسهل ترويضة و تدريبة


راقب الطائر و حاول تختار واحد نشيط، حركته سريعة، و ميكنش مستقر في قاع
القفص

لأن طبيعة الطيور بتخبي تعبها لحد متصل للمراحل الأخيرة، عشان كدا اختار طائر نشيط و بيتحرك كثير. بيطير من عصل لعصا، و رد فعله سريع. لكن لو حسيت ان الطائر نافخ نفسه, حركته بطيئة و مستقرفي  قاع القفص، دا معناه ان في احتمالية ان الطائر تعبان


ريش الطائر

الريش الصحي دليل على صحة الطائر و اهتمام و رعاية صاحبه له. و العكس صحيح
كل ما  ريش الطيركان  جميل، متساوي  و ألوانة ناصعة، بيكون دليل على صحته. و تأكد من عدم وجود أي بقع صلع بريش الطائر


.تأكد من سلامة منقار و أرجل الطائر

تتميز رجل الببغاء بوجود 4 صوابع. 2 أمامية و 2 خلفية
تأكد ان ميكنش في أي اعاقات بالمنقار و الأرجل و الأظافر. و تأكد ان ميكنش في قشور عليهم


العين؛

تكون مفتوحة و صافية


نوع و نظافة الأكل و المياه، و القفص الموجود فيه الطائر؛

فطبيعي دول أكثر حجات تبين مدى الاهتمام و بالتالي صحة الطيور


و بشكل عام عند شرائك لأي نوع طائر؛

حاول دائماً تسأل قبل الشراء و تتأكد من أمانة التاجر و حسن معاملته لكل الحيوانات العنده
.و حاول تشتري من مربي، مش من بائع عادي لو متاح. عشان تكون متطمن على صحة الطائر، و تتأكد انه مدرب و مش بيخاف من البشر
تأكد أن الطائر تربية مش صيد. لأن الطيور الصيد مشاكلها كثير جداً جداً، دا غير ان الطائر بيكون مقهور و الحبس شبه تعذيب له. و كمان متشجعش على هذا النوع من التجارة لأن للأسف معظم البائعين بيتعاملوا مع الطيور كتجارة و طيور الصيد بتكون سعرها أرخص. و الطيور بتتبهدل و كثير حالتهم بتكون صعبة جداً

مهم جداًل
و عندك طيور أو حيوانات ثانية في البيت، انك تفصل بينهم تماماً في الفترة الأولى من استقبال الطائر الجديد، لحد ما تتأكد ان الطائر بخير و معندوش أي أمراض ممكن تعديلك الباقي

:الرعاية و العناية بالطائر

!و احنا بنفكر في رعاية أي حيوان، لازم تفكيرنا ميكنش مقتصرعلى كيفية ابقاء الحيوان علي قيد الحياة و بس

لازم نفكر أكثر ازاي نسعد الحيوان دا و نعطيه الأشياء الكان هيقدر يخذها في حياته البرية قدر المستطاع، ليستخدم فطرته و قدراته الكامله زي ما ربنا قدرله و هيأه. فكردائماً ازاي تمنحه أفضل قيمة لحياته، اعطيه حق الاختيار و ادرك انك بتتعامل مع روح لها احتياجات و مشاعر… فتعلم كيف تكسب ثقة هذا الحيوان أو الطائر الانت اخترت انك تشيل مسئوليته، و لا تعتذر عن المسئولية، ولو حكمت ظروفك، اوعى تتخلى عنه لأي حد.  متسبوش إلا لحد فعلاً هيراعي ربنا فيه

كثير مننا بيربط رعاية البادجي أو أي طائر بالتزاوج. و للأسف دا كمان شئ غلط لأن مينفش تقوم بتزاوج البادجي غير لما يكون عندك الخبرة الكافية عشان تقدر تراعيهم، و تتدارك المشاكل الصحية لو صدرت، و تطلع سلاسلات قوية و تكون عندك القدرة و الوقت و المساحة الكافية لذلك

و بشكل عام، للحفاظ على صحة الطيور، يفضل عدم وضع العشة أكثر من مرتين في السنة، و تكون في فترة من الربيع الى الصيف (شهور التزاوج) لنجاح العملية
..و موضوع التزاوج يطيل شرحة عشان كدا هنتكام فيه لوحده في موضوع آخر، لكن الهنتكلم عليه هنا هو كيفية الرعاية الصحيحة
طيب كيف تكون رعاية البادجي و ازاي تخليه سعيد؟

:الطعام و الشراب، و النظام الغذائي للبادجي

البادجي من آكلي البذور، بيحبوها جداً، بس مينفعش يعتمد نظامهم الغذائي على الحبوب فقط. لازم تنوع أكلها بين البذور و الخضار و قليل من الفاكهة و البروتين؛

الكالسيوم – مهم جداً و لازم يكون دائماً موجود في القفص
(نصف بياض بيضة مسلوقة – (مرة كل اسبوع

:أنواع البذور المفضلة

(أ. فلارس و خلطة – (اخلطهم على بعض و قدمهم للطائر

ب. دخن

ج. بذور زهرة دوار الشمس (اللب السوري) – مع مراعاة ان البذور دي تعتبر نسبة الدهون فيها عالية للطيور و بالأخص للطيور في الحبس لأن حركتها أقل من الطيور البرية، فا الكثير من لب دوار الشمس ممكن يتسبب في زيادة وزن الطائر و التأثير على صحتة

انصح باستخدامه كمكافئة في وقت التدريب، و يستخدم لتشجيع الطائر للوقوف على اليد و غيره عند التأليف و التدريب

:ولكن بجانب البذور، لازم كمان يقدم أنواع الخضار و الفواكه المختلفة مثل
تربية و رعاية طائر البادجي - petsoholic

(الجرجير (بالأخص في فترة التزاوج •
• بقدونس -اختلفت عليه الآراء لكن الرأي الأقوى ينصح به
ذرة مسلوقة •
أرز مسلوق •
(خيار- (قليل – فالكثير يسبب اسهال •
جزر •
بطاطس•
(بطاطا – (مسلوقة أو عادية •
بروكلي •
(خس – (مش كابوتشي •
كرنب •
عنب •
كيوي •
(تفاح – (بدون بذر •
موز •
(بطيخ – (قليل – الكثير يسبب اسهال •
(برتقال و يوسفي – (بدون بذر •

و غيرهم الكثير، ولكن دي مجموعة اختيارات ممكن تغير فيها… و طبعاً خلي بالك مع الوقت كل ما هتتعرف أكثر على الطائر، هتعرف هو بيحب ايه و بيفضل ايه، لأن كل طائر فرد مختلف عن الآخر، و كل فرد له أكلات بيفضلها عن الأخرى تماماً مثلن

:الأكلات السامة و المضرة للبادجي – تجنب

.الشوكولاته و أي سكريات أو ملح أو بهارات سامة للطائر •
ً.الكافين سام جدا •
.المشروبات الكحولية سامة •
.أفوكادو •
.(بذر الفلفل الأخضر (فيفضل تجنب الفلفل الأخضر في المطلق •
.(البصل و الثوم – (و لكن للثوم استخدامات أخرى وقائية و علاجية سنتحدث عليها لاحقاً •
.بذر التفاح •
.(الأرز الني (الناشف •
.الفول السوداني •
.منتجات الأبان و اللاكتوز •
.ماشروم •

:المياه

يفضل استخدام مياه مفلترة للشرب، لأن الطيور كائنات حساساة جداً، و مياه الحنفية مؤذية جداً لهم لما فيها من ترسيبات و تلوث و كلور و غيره. و يمكن تقديم عصير من الفواكه المذكورة سابقاً للطائر بجانب المياه

هل تعلم؟

في الطبيعة، لا تأكل الطيور من نفس الطعام كل يوم، فكل يوم بتأكل حسب المتاح. عشان كدا حاول دائماً تقدم للطائر أنواع مختلفة و تعود طيورك تأكل كل حاجة. متجبروش على نوع أكل معين، و دي أول خطوة في رابط الثقة بين الطائر و صاحبة
Budgie_Love_Petsoholic

:التفاعل مع الببغاء و الطيران خارج القفص

مهم جداااً انك تعطي الطائر مساحة للطيران خارج القفص لمدة ساعة على الأقل يومياً مهما كان حجم القفص
فقلة الطيران بتسبب مشاكل كثير جداً صحية و نفسية للطائر زي الاستسلام و الاكتئاب، و السمنة و مشاكل في النظام التنفسي، عشان كدا للأسف معظم الناس البتربي طيور بتتفاجئ بموتها خلال عام أو اثنين.، متخيلين خطاً ان دا متوسط عمرهم
فتخيل لو عشت عمرك كله محدود الحركة داخل قفص صغير. و اه أنا بشبهنا بالطيور لأنهم شبهنا أكثر مما نتخيل

بس قبل ما تطير الطائر، لازم تاخد بالك ان الشبابيك مغلقة، و ان مفيش أي حاجة خطر في الغرفة ممكن تئذي الطائر
و قريباً في مقالة أخرى هكلمك بالتفصيل عن كيفية الاستعداد لللإستقبال أي طائر بالبيت

:حجم القفص و بعد مسافة السلك

:أ. حجم القفص

القاعدة الثابتة عند شراء أي قفص لأي طائر هي؛ أن يكون حجم القفص ضعف حجم الطائر و جناحاته مفرودة و لازم يكون للطيور مساحة من الوقت للطير خارج القفص يومياً

“مفيش قفص كبير كفاية… بس أقفاص كثيرة ممكن تكون أصغر من اللازم”

فمن المعلومات الخاطئة الهتسمعها من البائعين؛ ان “البادجي” لازم يكون في قفص صغير عشان التزاوج! خطأ تمامااااا، فالطيور بتتزاوج بحرية خارج و داخل القفص فقط عندما تريد و تكون على استعداد و تكون متطمنة بالعشة و في المكان. أي تصرف مختلف بيكون لقلة الحيلة و الشعور بالإستسلام لقلة المساحة المتاحة للحركة

فقط لأنهم طيور صغيرة، دا لا يعني انها لا تحتاج مساحة كبيرة للطيران و الحركة. البادجي طائر لعبي و نشيط و بيحب الحركة و الطيران، و النط من فرع للآخر. فلازم تعطيه المساحة الكافية لذلك

أصغر حجم مناسب لقفص البادجي كما نصح به المتخصصون للطائر الواحدهو؛
45.72 سم X 45.72 سم
.و كل ما زاد عدد الطيور، يكبر حجم القفص بنفس النسبة

round cage warning
تحذير!  تجنب شراء القفص المستدير

بالرغم من انتشاره، الا انه يعتبر ن أسوأ أنواع الأقفاص مهما قالك البائع انه مستورد أو غيره. الطيور بتحتاج لوجود أركان بالقفص. القفص المستدير بيزيد من توترهم و عنفهم بشكل كبير

الطيور بتحب تتجه للأركان عند الشعور بالخوف أو القلق. والقفص الدائري لا يعطيها هذه الفرصة مما يزيد شعورهم بالخوف و التوتر

:ب. بعد مسافة السلك

 بعد مسافة السلك في غاية الأهمية. عشان لو المسافة كبيرة أو أوسع من الحجم المناسب للطائر، ممكن يزنق راسه بين السلك الشئ الممكن يتسبب في خنقه أو موته
بالنسبة للبادجي، فالمسافة المنصوح بها هي؛
سم1.5875 – 1.27سم

:اللعب و الحوامل و الستاندات

Budgies toys

أنواع لعب الطيور كثيرة و مختلفة. بس مش دائماً بتكون متاحة في بلادنا بالأخص للطيور الصغيرة
اللعب و الستندات مهمة جداً بالنسبة للطيور. و معظم البائعين لو سألتهم هيقولولك ان البادجي مش محتاج لعب و دي من أكثر المعلومات المخطوءة المنتشرة بين البائعين في البلاد العربية أو على الأقل في مصر

قلة وجود الشئ بيحفذ على الابتكار. فلو انت مستغلي اللعب المتاحة أو مش لاقي لعب حلوة و آمنة على الطائر، ممكن تعملهم بنفسك في البيت من أشياء بسيطة و متاحة عندك. لو دخلت على اليوتيوب هتلاقي حجات كثير جداً ممكن تعملها و مش هتكلفك أي حاجة

:أنواع الستندات أو الحوامل المريحة و الصحية لقدم الطائر

الستندات المتعارف عليها للطيور صغيرة الحجم في بلادنا هي الستندات البلاستك، و العادتاً بتكون أحجامها متقاربة، و سبب انتشارها هو بساطة أسعارها و قلة المعرفة بالمشاكل الصحية المترتبة عليها

الستندات هي ممكن تكون أكثر شئ مهم رعايته في تربية الطيور بعد الاهتمام بالنظام الغذائي. لأن الستندات هي أكثر شئ بيقف عليه الطائر معظم اليوم لو مش اليوم كله. فلازم الستاندات الهتجبها تكون؛

:أ. أحجامها مختلفة

مما يماثل غصون الأشجار و اختلاف أحجامها… فلو الطائر عاش معظم حياته بيقف على ستندات بنفس الحجم و المادة… و بالتالي نفس حركة قفل القدم حولها. فا دا بيسبب ألم شديد و ممكن يبدأ يحصل مشاكل لقدمه زي؛  القروح و بعض التشوهات

:ب. مريحة

أفضل أنواع الستندات هي الخشب و الحبال، باختلاف أشكالها و أحجامها و نوعية الخشب المستخدمة

:ج. تجنب الستندات البلاستيكية قدر المستطاع

مثل ما ذكرنا ان؛ مشاكل الستندات البلاستك كثير، و استخدامها مؤذي جداً لقدم الطائر بالرغم من انتشارها
أولاً؛ غير مريحة تماماً لقدم الطائر و مع الوقت بتسبب مشاكل كثيرة مثل القرح و غيرها كما ذكرت سابقاً
ثانياً؛ معظمها لا يساعد الطائر على برد أظافره
ثالثاً؛ استخدام مادة البلاستك بصفة عامة بتكون عرضة للتفاعل و لم الباكتيرا أكثر، بالذات ان عادتا معظم التجار المعنهمش أمانة بيشتروا أردأ الأنواع
و بما ان الطيور بتحب تعض في الأشياء لبرد منقارها، فتدخل قطع صغيرة جدا من البلاستك في بطنها مما قد يقصف عمر الطائر

فلو اضطررت لاستخدامها، على الأقل ضعها في القفص من تحت و خلي الستاند الخشب هو الفي أعلى القفص. لأن الطيور بتمضي معظم الوقت في أعلى القفص إلا لو نزلت للحركة أو الأكل أو غيره

:اللعب
ايه اهمية اللعب؟ و ايه أنواع اللعب المختلفة الممكن نجبها للبادجي؟

اللعب للطيور مش مجرد لعب بالمعنى المتعارف عليه

فمن المفترض انها تعادل أشياء بيعملها و يستخدمها الطائر في الطبيعة، مثل استخدام المنقار في الخشب و استخدام ذكاؤهم في البحث عن الطعام، و أشياء أخرى كثيرة… فأهمية اللعب هي انك تخلي الطائر يستثمر كل قدراته الجسدية و العقلية على أكمل وجه كما خلقه الله لذلك

ففي الطبيعة، تستثمر الطيور معظم وقتها في البحث عن الطعام بالطيران من مكان الى مكان و التكسير في الأشجار بمنقارها،  البحث عن الحبوب في الأرض، و الفواكه  و الخضروات في الأشجار.. ولكن في بيوتنا، كل حاجة بتصلهم جاهزة، فبالوقت لو مجبتش بدائل مشابه و استثمرت من وقتك لتدريب الطائر و تغذية وقته و قدراته و ذكاؤه،  بيبدأ يشعر بالاكتئاب و الملل و الإستسلام، و كمان بيحصله مشاكل صحية زي السمنة… كل هذه الأشياء بتؤثر بقوة على صحته

و زي ما ذكرت سابقاً، انك ممكن تعمل ألعاب كثير جداً بنفسك في البيت، باستخدام أشياء بسيطة مثل كرتونة المناديل و الكبيات الورقية و غيرها
حجات بسيطة جداً بالنسبة لنا، لكن كبيرة جداً بالنسبة لهم

!احترس عند اختيار الألعاب

.ميكنش فيها ألوان صناعية أوأي كيماويات ضارة و سامة للطائر •
.متبقاش فيها أشياء حجمها صغير و ممكن يبلعها أو تتزنق في بقة أو زوره •
.تجنب المرايات اللعبة •
بالرغم أيضاً من انتشارها بالمحلات، إلا انها بتخلي الطائر في حالة عصبية و بتنرفزه جداً و ممكن يصبح مهووس بها حرفياً، و ممكن فجأة يعضك بدون سبب أو تلاقيه أصبح عنيف و تتغير سلوكياته

:تنظيف القفص

cleaning bucket

،مهم جداً تنظيف القفص باستمرار لعدم انتشار الباكتيريا و الأمراض
فهناك طريقتين للتنظيف؛
.التنظيف الروتيني اليومي و التنظيف العميق و يكون مرة كل شهر أو أكثر حسب الاحتياج

:التنظيف اليومي الروتيني

أ. تغيير المياة كل يوم و غسل المشربة جيداً من الداخل بمياه فقط، أو مياه و خل
لأن المياة الراكدة بتكون بكتيريا و فطريات. و هتلاقي دائما و انت بتغسلها احساس بشئ لزج و هيدي بتكون الباكتيريا المكونة بالداخل
.فلازم تغسلها و تمليها تاني بمياه نظيفة مفلترة

 ب. تنظيف أو تبديل طبق الطعام، والتأكد من وجود الطعام الكافي و تنظيفة من أي بقايا من وسخ الطيور ان وجد منعا لانتشار الأمراض و الباكتيريا

ج. تغيير الفرش في قاع القفص، أنا شخصياً بفضلا استخدام مناديل المطبخ السميكة في القاع فوق السلك، بالطريقة دي بيكون التنظيف اليومي سهل جداً بمجرد انك تشيل المناديل القديمة و تقوم بتغييرها

تحذير بلاش تستخدم ورق الجرنال في القفص؛ لأن الطيور كائنات حساسة جداً و الحبر في ورق الجرنال بيسبب تسمم و مشاكل تنفسية للطيور، و كمان الطيور أحيانا ممكن تعض في الورق كنوع من اللعب و تبلعه بالغلط و دي مشكلة خطيرة

 تحذير!  بلاش تستخدم الصابون في تنظيف القفص أو أي منظفات كيماوية؛ سامة و مميتة… حتى لو غسلتها كويس جداً فالمواد دي بتترك بقيا احنا مش بنشفها بعينا
استكمل القراءة لتعرف المواد الطبيعية الآمنة لتنظيف القفص و التخلص من الباكتيريا و الأوساخ

:التنظيف العميق

يفضل ان تقوم بالتنظيف العميق للقفص مرة كل شهر بشكل عام… و أكثر أو أقل حسب شعورك بإحتياج القفص لذلك

:عشان تنظف القفص بعمق…هتحتاج  •
بخاخة –  مياه ساخنة – خل – ليمونة – ليفة جديدة
الليمون و الخل هيقتلوا أي باكتيريا موجودة و هيساعدوا على التنظيف بدون أي كيماويات ممكن تضر الطائر، و الليمون بيعطي رائحة منعشة للقفص

.شيل كل حاجة من القفص؛ اللعب و الستدات و أطباق الأكل و المياة •
(باستخدام البخاخة و الليفة، اغسل و نظف كل اللعب و الأطباق و قم بتنشفهم بفوطة أو اتركهم ينشفوا (يفضل في الشمس •
نظف القفص جيداً بالليفة و البخاخة، و قم بتنشيفه فوراً عشان ميصديش. و بعد كدا، رجّع كل شئ في مكانه داخل القفص •

.ملحوظة:  في حالة وجود بيض بالعشة، قم بتنظيف القفص بفوطة مبلولة، و بعد كدا نشفه بفوطة ثانية، منغير ما تلمس العشة أو تحركه

:الاستحمام

البادجي طائر استرالي، و المياة أو الاستحمام مهمين جداً بالنسبلهم عشان بتهدي البودرة الفي جسمهم و بتساعدهم على تنظيف و تقليم الريش
و لو قدرت تكتشف أكثر طريقة طائرك بيفضلها للاستحمام، هتستمتع بجد و انت بتتفرج عليه و تشوفه و هو بيلعب اد ايه فرحان و بتحس بعدها انه فعلاً مرتاح و ريشة نظيف و لونة اختلف

في ناس هتقولك حميه كل 4 أيام، و البعض بينصح بأقل أو أكثر
الحقيقة هي ان مفيش اجابة محددة، لأنن عدد مرات الاستحمام و الطريقة المستخدمة، هتعتمد على حجتين؛ أولاً، درجة حرارة الجو، و ثانياً شخصية و تفضيل طائرك الخاصة

أهم شئ انك تحميه الصبح و في مكان مشمس

:يوجد 4 طرق ممكن تحمي بيها الطائر، و دورك انك تجرب كل الطرق و تشوف أكثر طريقة يفضلها الطائر بتاعك
:أ. باستخدام زجاجة رش أو بخاخة

معظم طيور البادجي بتحب جداً هذه الطريقة.
املأ الزجاجة بمياه مفلترة فاترة. و قم برش الطائر بهدوء. لو بدأ الطائر يرفرف بجناحة، و يقلب نفسه بالماء و  حاول الاقتراب من الزجاجة فا دا يعني انه مبسوط و مستمتع جداً، و انت نفسك هتستمتع و انت بتتفرج عليه
لكن لو وجدته بدأ يطير بعيد عن مصدر المياه و حاول يهرب منها يبقا توقف قليلاً، و حاول مرة أخرى، لو فضل يهرب يبقا وقف و المرة القادمة جرب تستخدم أحد الأساليب الأخرى

و تذكر دائماً أن علاقتك مع الطيور هي علاقة ثقة متبادلة. فلا تجبر الطائر على فعل أي شئ بالغصب أبداً

:ب. استخدام طبق المياة التقليدي

.فقط املأ طبق من أطباق الأكل شوية صغيرة من المياه، و خذ بالك ميكنش عميق عشان ممكن الطائر يقع فيه و يغرق نفسه فا دائماً احترس.  و ممكن تحط شوية بقدونس في المياه
هتلاقي الطيور بتشرب من الطبق و بتنزل ديلها و جسمها في المياة و بتغني و مستمتعة جداً

:ج. استخدام الحنفية المفتوحة

هذه الطريقة برجحها أكثر بعد ما تكون الطيور ولفت عليك
خذ الطائر عند الحوض بعد التأكد من انك شلت أي شئ ممكن يكون خطر عليه… اغلق الحوض بالسدادة و افتح الحنفية و خلي المياة فتره، ولا سخنة ولا ساقعة

:د. استخدام بعض الخضرة المبلولة

بالضبط زي ما قرأت. هتغسل الخضرة، سواء كانت بقدونس أو جرجير أو غيره. و تحطهم مبلولين فوق القفص أو في أي مكان في القفص بحيث ان الطيور تقدر تقف عليه. مفيش طائر مش بيستمتع بالإستحمام بهذه الطريقة… هتلاقيه بيقلب نفسه في المياه و يفرفر جناحة و يتقلب و شكلهم بيكون مضحك جداً

 حاجات ممكن تبان بسيطة جداً، بس بتسعد الطائر و بتحافظ عليه و على حالتة الصحية و النفسية، فجرب كل الطرق و راقب طيورك و اعرف كل واحد فيهم بيفضل ايه

:النوم

 يحتاج البادجي من 10-12 ساعة من النوم المتواصل يومياً
قلة النوم بتأثر صحة الطائر العامة و كمان بيأثر جداً على مزاجهم و سلوكياتهم، زي أي كائن حي بما فيهم احنا البشر لو منتش كويس بتتعب و ممكن تنزعج جداً من أبسط الأشياء

:أشياء يجب مراعتها وقت النوم

لازم يكون المكان هادئ و مظلم وقت النوم لكي يستطيع الطائر انه ينام
بعض الناس بتنصح بتغطية القفص وقت النوم، لكن بخبرتي الشخصية ان الطريقة دي مش بتتناسب مع كل الطيور، يعني فيه طيور بتشعر بالأمان لما بنغطي القفص بالليل و علي العكس فيه طيور ممكن يحصلها ذعر و بتخاف جدا منه. فا دي نقطة ترجع لطبيعة و شخصية الطائر بتاعك.
مع مراعاة عدم تغطية القفص في الصيف عشان الحر و قلة الهواء ممكن تخنق الطائر لقدر الله

:التفاعل مع الطيور

في البرية، تعيش ببغاءات البادجي في أسراب كبيرة، الشئ البيخليهم طيور اجتماعية جداً، و صعب جداً تشوف بادجي عايش لوحده في الطبيعة أو منعزل إلا لو كان تعبان أو مجروح
؛(monogamous) دا غير ان ببغاوات البادجي طيور أحادية الزواج
بمعنى ان زوج الطيور بيفضلوا مع بعض في الطبيعة طول عمرهم، و مينفعش تفرقهم أبداً

طيب ايه اهمية الكلام دا؟

أهميته هي انك تعرف ان الطيور لما بتثق في صاحبها، بتعتبره أحد أفراد السرب. و بتحتاج اهتمام كبير من صاحبها. و صعب جداجداً عليها انها تتعايش لوحدها عشان كدا لازم تدي الطائر اهتمام بقدر محبته لك. و تخصصله وقت يومي لتفاعل والتدريب مش بس تمضية وقت و خلاص
و مينفعش تربي بادجي واحد لوحدة لأنه هيكتئب جداً. أفضل تجيب 2 و مش لازم يكونوا أزواج. يعني لو مش حابب الطيور تتزاوج عندك أو معنكش خبرة كافية ممكن تجيب ذكرين أو انثتين

…لاحقاً في مقال آخر، هشرحلك بالتفصيل طرق تدريب البادجي الصحيحة

شكراً لمتابعتكم و أتمنى أكون قدرت أفيدكم… لو عندك أي أسئلة، متترددش انك تبعتلي و أنا هحاول دائماً أرد على كل الأسئلة... هتلاقوني دائماً موجودة للرد على اسئلتكم على صفحة الفيسبوك أو انستجرام
و لو حابب تتابعني و تعرف نصائح مختلفة عن تربية حيواناتك الأليفة و تتابع كل المقالات الجديدة، اضف بريدك الالكتروني و انضم لنا  أو تابعني  على صفحة الفيسبوك و بينتريست و اينستجرام

موضوعات أخرى

About Us

I started this blog because I wanted to create a community for animal lovers, and hopefully my experience would help you guys with every little aspect about your Furry and Feathered friends; from training, to communication, health, diet and much more.

More About Us

تواصل معي

  • Petsoholic@gmail.com

38 replies on “تربية و رعاية طائر البادجي”

سلام رانيا…
شكرا لاهتمامك..
تابعي المدونة انشاءالله هيكون في مقالات بتفاصيل أكثر عن كل أنواع الطيور و طرق التربية الصحيحة… 🙂
و ممكن تتابعينا على الانستجرام عشان تعرفي كل ما ننزل مقال جديد

Like

السلام عليكم أمير..
مفيش مشكلة الأنثى هتابع البيض لكن أ÷م شئ متجبش ذكر بديل لحد ما دورة البيض تخلص أو البيض يفقص…

Like

السلام عليكم انا عندي عصفورين ذكر وانثي الانثي كانت كويسه لقيت رجليها مش قدرا تقف عليها بس كانت عملاه تعمل بمنكرها في رجليها ممكن تسعديني لا اني مش عارف اعمل ايه وشكرآ

Like

عايزة اعرف ازاي يتعود اصل انا عندي اتنينبادجي و جبتهم منحوالي اسبوع وبيختفو مني ما يخلوني المسهم فكيف اخليهم ما يخافو وشكرا

Like

سلام أمل…
بعتذر عن التأخير في الرد…
طبيعة الطيور في الطبيعة انها حيوانات فريسة.. عشان كدا بتاخد وقت أكثر لحد ما تثق في صاحبها على عكس القطط و الكلاب مثلا..
لكن بالمعاملة و التدريب المزبوط بيثقوا فيكي واحدة واحدة..
و حتى لو بقالهم فترة عندك و علاقتكم متوترة دائما ممكن نرجع ندربهم من جديد مفيش مشكلة…
لما الطير بيثق في صاحبة بيبدأ يعتبره فرد من أفراد السرب بتاعه و بيحبه و بيخاف عليه و بيرطبت به جدااا..
1. أول حاجة هتفضلي لمدة اسبوعين متعملش اي شئ غير انك تدخلي تحطي الاكل و المياه منغير ما تحاولي تدخلي صوابعك او ايدك في القفص او تمسكيهم..
لازم الطائر يفهم انك عمرك ما هتجبريه يعمل حاجة هو مش عيزها و يثق ان ايدك دي حاجة ميتخفش منها..
2. تبدأي تعدي جنب القفص منغير ما تقربي منهم بس يبقو شيفينك… و متبصيش في عينهم..
اتكلمي معهم صفري.. غنيلهم.. اقرأي كتاب بصوت المهم يسمعو صوتك و يحفظوه

3. حطيلهم اكل مختلف مع الحبوب زي انواع الخضروات المختلفة.. بقدونس مثلا.. او جزر.. قطعة تفاحة صغيرة
4. اغلقي النوافذ و سبيهم في غرفة ميكنش فيها اي حاجة خطر عليهم و افتحي باب القفص..
الطيران مهم جدااااا للطيور عشان صحتهم بتتأثر بعدم الطير.. غير انهم بيفهموا انك بتحبيهم و مش هتحبسيهم فا بيببدأ ثقتهم فيكي تزيد..
و طبيعة الطيور مع الوقت هتلاقيهم وقت النوم بيرجعوا القفص لوحدهم.. لو دا محصلش هتمسكيهم بالراحة بفوطة صغيرة عشان ميخفوش من ايدك و تدخليهم القفص..

5. هتبدأي بعد الاسبوع الثالث او الرابع تحطي في ايدك مثلا لب دوار الشمس و تكوني شيلاه من طبق الاكل الرئيسي.. و يفضل يكون الصبح بدري..
و هتدخلي ايدك في القفص و تثبتيها.. متحوليش تحطيها امامهم او تفضلي تحركيها او تقربي عليهم عشان هيفتكرو انك بتهجمي عليهم و هيخافو…
و دائما وجهي اهتمامك للذكر لأن طبيعة الذكور اجتماعية اكثر من الاناث.. الاناث ربنا خلقها بتخاف و بتدافع عن نفسها عشان هي البتبيض و كدا..
و طبعا متنسيش قبل بداية التدريب دا كله تكوني شايلة العش..
الطيور بنحطلها العشة مرتين او 3 في السنة بالكثير للحفاظ على صحته الاناث..

اول و ثاني و ثالث مرة ممكن ميجوش.. لكن مرة في مرة هيبدأوا يقفوا على ايدك و يكلوا اللب منها.. لما دا يحصل اوعي ابدا تحركي ايدك او تسرخي او تهزي ايدك.. و توقعي انهم اول ما ييجو يقفو على ايدك هيمسكوها بمنقارهم و بعدين يقفوا..
الطيور بتعمل كدا قبل الوقوف على اي شئ جديد عشان تتأكد ان الشئ دا ثابت و مش هيقعوا.. الطيور بتستخدم منقرها زي ما احنا بنستخدم ايدينا..
فا في اللحظة دي لو اتخضيتي و شلتي ايدك هيخاف جداا و هيبقا صعب جدا نرجع ثقنه في الايد ثاني..
و هيبدأوا يربطو ايديك بأشياء ايجابية فا يثقو فيكي اكثر..
و استمري مرة في مرة لحد ما هتلاقيهم بيفرحوا جدااا اول ما بتدخلي عليهم و بيحتفلو و بغنو.. لما توصلي للمرحلة دي ابعتيلي ثاني هشرحلك نعمل ايه المرحلة البعدها عشان نبدأ ندربهم يقفوا على ايدك و يجو لما تناديهم و حجات ثانية..
و أهم أهم شئ في تربية الطيور هي الصبر و الاستمرارية..
لو مفقدتيش الأمل فيهم و زهئتي هتوصلي معهم لمراحل جميلة جدا و تبقي بجد ربتيهم صح و اسعدتيهم…
و انشاءالله قريب جدا هكتبلكم مقال تفصيلي عن طريقة تدريب البادجي للمبتدئين فا تابعي معيا على Instagram…
يا رب تكوني استفادتي…

Like

هل يمكنني ان اغطي القفص في اليل لكي ينام البادجي وكم ساعه اغطيه لاني لايمكنني اطفاء النور والسؤال الثاني هل يمكنني ان اربي انثى بادجي لوحدها لمده لاتقل عن سنه او سنتين ومن ثم أتي لها بذكر او انثى مثلها والؤال الاخير كم ينام البادجي و هل يمكنني ان اصنع له العاب من الكرتون اتمنى الاجابه وشاكر المجهود وشكرا….

Like

اهلا بيك فيصل.. تشرفت بسؤالك..

1. طبعا ممكن تغطي القفص بالليل عشان ينام.. الحالة الوحيدة اليفضل منغطيش فيها القفص هي لو الطائر خاف من الغطا فا في الحالة دي هتحتاج تعوده عليه الأول بس…
و البادجي لازم ينام 12 ساعة في اليوم..

2. تربية بادجي 1 في قفص ايا كان نوعه ذكر او انثى لايفضل تماما لانه غالبا بيجيله اكتئاب… لو عايز تربي بادجي انثى بدون ذكر خوفا من التزاوج فا ممكن ببساطة متحطش صندوق العشة في القفص في الحالة دي هيحصل تزاوج قليل جدا و الانثى لو باضت بيكون بيض فاضي (مفيهوش طيور)

3. البادجي لازم ينام زي ماقلتلك 12 ساعةفي اليوم. و ااه ممكن تعمله لعب من الكرتون بالعكس دا كمان مطلوب…
المهم ميكنش فيه حبر او قطع صغيرة مثلا زي الخرز الصغير ممكن يبلعها و تقف في حلقه…
يا رب اكون عرفت افيدك و لو عندك اي اسئلة ثانية ابعتلي… و لسرعة الرد ابعتلي على الانستجرام او الفيسبوك…

Like

نور… شكرا جدااا لذوقك…
اتنى تكوني استفدتي و تابعي معيا باقي المقالات ان شاءالله هحاول اقولكم تفاصيل اكثر عن البادجي و باقي الطيور و الحيوانات… 🙂
تابعيني على الفيسبوك ز انتغرام عشان تتابعي المقالات الجديدة…

Like

عندي استفسار ,, و اتمنى انك تساعديني ,, انا اول مره اجيب بادجي عندي ,, اشتريت ذكر و انثى ,, و لكن صحيت تاني يوم و سه ما اكلوا و لا شربوا ,, و انا حاطه لهم الاكل ,, و ساكتين طول الوقت ,, و لكن بس اشغل لهم صوت طيور البادجي ,, بصيروا يتحركوا ,, و لكن الى الان ما اكلوا و لا شربوا ,, فما هو. الحل,, شكرا لكِ

Like

نور… تشرفت بيكي و أتمنى أقدر اساعدك…

اولا متقلقيش دا طبيعي الى حد كبير… بس انا محتاجة اعرف هم سنهم اد ايه؟
بصي الطيور لأن طبيعتها انها “فريسة” فا بتخاف جدااا و بتحتاج وقت عشان تتعود على أي مكان او اشخاص جديدة…
فا طبيعي ممكن يفضلوا اول يوم او يومين احيانا مش بياكلوا بسبب الخوف…
فا عشان هم في الطبيعة بيعيشوا في سرب كبير فا لما بتشغليلهم اصوات البادجي بيتفاعلوا معها و دي حاجة كويسة…
بس انت محتاجة:
1. حطي القفص في مكان يكون مرتفع لأن الطيور بالذات لما بتكون خايفة بتحب تقف على اعلى مكان موجود في الغرفة الهم فيها

2. متحاوليش تدخلي ايدك في القفص او تفاعلي معهم غير ممكن تعدي جنب القفص و تتكلمي بصوت هادي معهم عشان يعرفوا صوتك و يتطمنولك… و افضلي على كدا اول اسبوع و يا ريت يكون القفص كمان في مكان هادي و لو في أطفال بلاش نخليهم يلعبوا معهم دلوقتي…

3. حطيلهم حبوب فلارس و خلطة، و كمان كل يوم حطيلهم نوع خضار او فاكهة… البادجي بيحبوا البقدونس و الجرجير جدااا على سبيل المثال…

4. خلي بالك من شكل القفص لو دائري او صغير دا بيزود من توترهم جدا

5. خلي بالك ان البادجي لازم يناموا 12 ساعة في اليوم

6. يا ريت تحطيلهم لعب في القفص…
شوية بشوية هتلاقيهم بيخدوا عليكي و بياكلو و يلعبوا و كل حاجة…

يا ريت تطمنيني الوضع ايه دلوقتي و تابعي معيا ان شاءالله لسة في مقالات و تفاصيل كثير عن تربية البادجي و الطيور… و لو عندك أي اسئلة ثاني ابعتيلي دايما… بس لو محتاجة رد سريع يا ريت تبعتيلي سؤالك على الفيسبوك او انستغرام… 🙂

Like

انتي جميلة أوي وانا حبيت طائر البادجي بسبب أسلوبك الجميل
هانزل النهارده إن شاء الله أشتري جوز
ادعيلي بالتوفيق

Like

السلام عليكم ،
عندي زوج طائر بادجي
ذكر وأنثى
هم عندي من ٨ شهور
و اشتريت انثى عاوزه ادخلها معاهم بس بيضربوها
ايه الحل

Like

شكرًا على المعلومات القيمة . كان عندي سؤال، انا عندي بيضة فقست امبارح وطلع زغلول بادجي والأم قاعدة عليه ومش عارف اعمل ايه و هي هتأكله ولا لأ ولا المفروض احط اكل جوا الصندوق؟ معلش اصل دي أول مرة. وشكرا جدا

Like

مقال رائع ووافى بجد. أنا باربى بادجى بقالى سنين كتير بحبهم وباحب أراعيهم وكل يوم باكتشف فيهم جديد .. كل عصفور ليه شخصية وطبع ومزاج فى حاجه مختلفه رغم انهم متفقين فى أغلب السلوك لكن بحس مزاجهم وطبعهم مختلف عن بعض . عندى سؤال: هل قشور البرتقال واليوسفى
بمقادير بسيطه مفيدة للبادجى والا لا؟ وهل ممكن اسقيهم منقوع هذى القشور الغنية بالعناصر والزيوت أم لا!!
شكرا جزيلااا

Like

طريقة التخلص من الحشرات من على جسم الطير وعلاج الأمراض لدى البادجي
فترة التزاوج الشهور
الأعتناء بالفرخ وهل يتم نقل الأفراخ الى قفص آخر أم تركهم مع الأبوين
في حالة موت الأم والأفراخ صغيرة كيف نطعم هذه الأفراخ الطريقة
وشكراً

Like

السلام عليكم ابراهيم…
بالنسبة للسؤال الأول: طريقة التخلص من الحشرات من على جسم الطير وعلاج الأمراض لدى البادجي
للأسف أنا مش طبيبة بيطرية فا يفضل انك تلجأ لطبيب للرد على السؤال عشان متضرش صحة الطيور… أهم شئ انك متستخدمش أي شئ بدون اللجوء لدكتور عشان الطيور حساسة جدا و ممكن أي حاجة غلط تموتهم بسهولة…
أهم شئ انك تهتم بنظافة الطيور و نظافة القفص و المكان لو دا حصل صعب يجيلهم اي حشارات او أمراض ان شاءالله…

بالنسبة للسؤال الثاني:الاعتناء بالفرخ أفضل شئ للطائر هو انك تسيبه لأبويه..دورك وقتها هو الاعتناء بنظافة العش يعني تقوم بتنظيف العشة بشكل مستمرعشان الأفراخ متمرضش
و تاخد بالك ان العش ميتحركش تماما و ان درجة الحرارة تكون دافية… و تاخد بالك من تغذية الأم و الأب جدا يعني تعطيهم حبوب و خضار و تحطلهم فيتامينات في المشربة بتاعتهم… و كالسيوم طبعا.. و بياض بيضة مسلوقة مرة في الاسبوع
و دائماَ تحت فتحة العش أنا بفضل أحط طبق كبير مليان حبوب بحيث ان لو لقدر الله فرخ أمه رمته من العش او هو وقع ينزل في الطبق ميجرالوش حاجة ان شاءالله… و تقدر ترجعه وقتها ثاني العش أو تهتم انت به حسب الوضع و سبب خروجه وقتها…

في حالة موت الأم و الأب أو لو الأم غشيمة و تركت الأفراخ:
بتجيب خلطة مخصوصة للأفراخ بتباع في محلات الحيوانات الأليفة..
و بتحضرها و تأكلهلم
ازاي:

أولا بتحطهم على حاجة تكون ناعمة و دافئة شبيهه بشعور أمهم ممكن فوطة صغيرة ناعمة مثلا.. و تبدأ تأكلهم الخلطة بسرنجة أو بملعقة
و في خلطات ممكن تعملها انت بنفسك… و بتأكلهك كل 3 ساعات و بعد فترة بتكون كل 4 ساعات…
الموضوع طبعا فيه تفاصيل أكثر بردو فا دا بشكل مبدأي كدا لكن ان شاءالله هحاول بردو اكتبلكم موضوع يكون في تفاصيل أكثر و صور للتوضيح أكثر..

Like

السلام عليكم ورحمه الله وبركاته
اولا صراحة كلامك جميل جداً وعاجبني وانا متفق معاكي في نقطة الاعتناء بالطائر
بس أنا عايز اعمل نظام تفريخ مع اني اكسب منهم فلوس مع الاعتناء بهم ارجو تردي عليا بسرعه مع طرق عمل للألعاب
وشكراً جداً على موضوعك الجميل
والسلام عليكم ورحمة الله وبركاته

Like

انا عندي ذكر و انسي يادجي ولاحظت من كام يوم انه احد الظوافر ابتدي يختفي من قدم البادجي الذكر و ابتدي يتنحل و يعمل فتله كانه الاصبع كله راح يضمر.

Like

السلام عليكم داليا.. انشاءالله تكوني بخير..
احتمال تكون الانثى هي العملت فيه كدا…
1. تأكدى انهم مولفين و ان الانثى مش بتعض الذكر…راقبيهم و تأكدي انهم مش بيتخانقوا…
2. واحيانا ممكن يكونو مولفين على بعض بس لو القفص صغير ممكن يتسبب في ان احد الطيور ينقر الاخر جامد..
لكن لو تأكدتي انها مش الانثى و شكه في وجود مرض بالطائر يبقا لازم توديه لطبيب بيطري…
لو عندك اي اسئلة ثاني ابعتيلي و لسرعة الرد برجاء التواصل على صفحة الفيسبوك او انستقرام.. 🙂

Like

السلام عليكم ، حضرتك بتقولي أنه طائر البادچي مينفعش يعيش لوحده و ف نفس الوقت سمعت لترويض الطائر لازم يكون عايش وحده بعيد عن أي مصدر الهاء ف ايه الحل ؟

Like

و عليكم السلام زياد…
سؤالك حلو جدا

بص بشكل عام الطيور بتعيش في الطبيعة في أسراب.. في أنواع تتحمل انها تعيش لوحدها و دا بشروط هوضحهالك دلوقتي، و في أنواع متتحملش..
فا البادجي من الطيور البتكتأب لو عاشت لوحدها
الا و حط تحت الا دي 3 خطوط… الا لو انت اعطتها وقتك بالكامل بمعنى انك تكون متفرغ للطائر طول اليوم و تلعب معاه و تدربه و… الخ
طبعا دا شئ صعب يحصل لمعظم الناس عشان كدا بنقول يفضل تجيب للطائر بتاعك مرافق ميترباش لوحده..

بالنسبة لنقطة التدريب…
ايوا الطيور لما بتدربها في وجود طيور ثانية بتتشتت و بتاخد وقت اكثر في التدريب خاصتا لو ذكر و أنثى…طيب ايه الحل؟ عندك 3 حلول…
1. يا اما تجيب الطيور تكون من الأصل مدربة و تربية فا تدريبها و ترويضها بيكون أسهل كثير و هتثق فيك بسرعة على الأغلب

2. وقت تدريب الطيور تفصلهم عن بعض تاخد الطائر الهتدربه في غرفة لوحده و تبدأ تدربه و بعد كدا ترجعه مع باقي الطيور
و وقت التدريب لازم يكون قصير و وقت ما تحس ان الطائر بدأ يزهق او متضايق ترجعه على الطول… عشان يفضل دايما متجاوب معك و يثق فيك

3. تجيب الأول ذكر لفترة محدودة لوحدة و تروضة و لما يتعود عليك و يبدأ يثق فيك تجيبله مرافق بس لازم تعوضه بوجود لعب كثيييير داخل القفص وتقضي معاه وقت كافي يوميا

و عامتا موضوع التدريب دا قصة كبيرة و ان شاءالله هكتبلكم طرق التدريب بكل تفاصيلها في مقال لوحده قريب..

Like

شكرا جدا للرد الوافي
ممكن لينك لصفحة الفيسبوك او الانستجرام؟
مع وافر الشكر

Like

سلام ديما.. انشاءالله تكوني بخير..
أفضل شئ انهم يكونوا في مكان يقدروا يناموا و يصحوا فيه مع ضوء الشمس.. مثلا أمام شباك في مكان هادي في البيت
لو دا مش متاح يبقا عشان يناموا لازم الجو يكون هادئ و تطفي النور.. و ممكن تغطي القفص. في طيور بتهدا لما بتغطلها القفص وقت النوم بس لو مش متعودين ممكن يخافوا فا جربي
و ممكن تأخري وقت النوم بس المهم ينامول 12 ساعة متواصلة…
يا رب أكون قدرت أرد على سؤالك.. لو عندك أي اسئلة ثاني ابعتيلي.. و للرد السريع يفضل تتواصلوا معيا على صفحة الفيسبوك و انستجرام:

Facebook: https://www.facebook.com/petsoholic
Instagram english page: https://www.instagram.com/petsoholic/
Ins. Arabic page: https://www.instagram.com/petsoholic_ar/

Like

السلام عليكم لو سمحتي انا عندي اربع عصافير ف قفص واحد ولا اعلم الذكر من الانثه بس ف اتنين متجوزين وبيضين ف العش وانا عرفتهم وف اتنين ثانين لا اعرفهم وعلطول بيتخنقو مع بعض اطلع اللي مش بيضين احطهم ف قفص تاني ولا اسبهم مع بعض

Like

سلام ماهيتاب…
نوع الطيور ايه؟ ممكن تبعتيلي صورة واضحة لهم عشان اقدر اساعدك… او وديهم لدكترو يحددلك نوعهم…
و لو الخناق عنيف يعني ممكن يئذوا بعض يفضل انك تفصليهم…
و لو القفص صغير ممكن يكون دا أحد اسباب انهم بيضربوا بعض

Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s