Categories
Home طيور عربي

تربية و رعاية طائر الكوكاتيل

معلومات أساسية

.ببغاء الكوكاتيل: معروف باسم؛ كوكتيل، كروان، أو الكالوبسيت
.(Nymphicus hollandicus) الاسم العلمي:  نيمفيكوس هولانديكوس
.الموطن الأصلي:  أستراليا
.الحجم:  يتراوح بين 30 – 33 سم
     متوسط العمر:  10 – 14 عام في البرية/الطبيعة، و يمكن أن يصل عمره الي 20 عام

طيب، ايه هو الكوكاتيل؟

ببغاء الكوكاتيل من أجمل أنواع الببغاوات، متميز بجمال صوته و قدراته الغنائية. و يتميز عن أنواع الببغاوات الأخرى بوجود دائره بلون خوخي او برتقالي زاهي على خده. ببغاء اجتماعي و رقيق جداً، و ترتيب شهرة اقتنائه كحيوان أليف عالمياً بتيجي تماماً بعد البادجي

الكوكاتيل من الطيور المحبوبة جداً و صعب أي حد يشوفه ميحبوش. ولكن بالرغم من كدا، الا انه مثل معظم الببغاوات؛ طائر فوضوي و يحتاج لرعاية كبيرة و اهتمام يمي. و مهم جداااا ان يخصص له صاحبه وقت للعب و التفاعل معه و اطلاقه خارج القفص يومياً و الا بيكون معرض  للاكتئاب

Cockatiels

:مواصفات الكوكاتيل

  يعتبر الكوكاتيل من الاختيارات المناسبة لشخص جديد في تربية الطيور و حابب يقتني طائراجتماعي يتفاعل معاه و سهل في تربيته و تدريبه، و في نفس الوقت يكون أكبر حجماً و مختلف عن البادجي الاسترالي الأكثر منه انتشاراً

:أهم صفات بتميز الكوكاتيل

صوته مميز جداً لأنه عنده القدره على الغتاء و تقليد الأصوات و تركيب نوت غنائية أو أصوات مختلفة مع بعض البيطلع منها مقاطع صوتيه خاصة به. بيتعلق بصاحبة جدا بالذات لو تم تدريبه و تربيته بشكل صحيح و بيصبح عنده فضول و رغبة في مشاركته و لفت انتباهه دائماً لأنه بيعتبرك فرد من السرب بتاعه

طبيعته اجتماعية و فضولية جداً . طائر رقيق و حساس و بيحب التفاعل و الاهتمام. و هناك اختلافات في السلوكيات و الشخصية كثيرة بين الأنثى و الذكر. اما بالنسبة للتكاثر فا مش بيكون سهل أوي بالأخص على الناس البتربي طيور لأول مرة

قوة منقاره متوسطة، بس خلي بالك ان الكوكاتيل “مثل معظم الببغاوات” بيعشق العض و النقر في كل شئ و بالأخص الأخشاب، و لعبته المفضلة هي تكسير أنواع الأخشاب المختلفة بمنقاره. لأن الطيور في الطبيعة بتقدي معظم يومها في البحث عن الطعام و بالنقرفي الأشجار و غيرها. دا غير انهم بيبردو منقرهم عشان لو دا محصلش بيبدأ يحصل تشوهات في المنقار. فا خلي بالك انك لازم لازم لازم تعوض دا بانك تحطلهم ألعاب كثير في القفص يقدروا يعضو و يكسروا فيها و كمان ممكن تخبي فيهم حبوب مميزة فا يفضلوا يكسروا و يعضوا في اللعبة لحد ما يطلعوها. و يفضل تكون خشب. و ممكن تصنعلهم ألعاب بنفسك في البيت من الورق و الكرتون و غيره. أهم حاجة عشان تخلي الطائر دائماً مبسوط انك تحطله اللعب و تتفاعل معاه بطرق تحفزه ذهنياً

:نوع ريش الكوكاتيل

الريش البودرة؛ من الجدير بالذكر ان هذا النوه من الريش يمكن أن يكون غير مناسب للأشخاص الذين يعانون من حساسية في الصدر

:صوت الكوكاتيل

تتميز ذكور الكوكاتيل بقدرات غنائية فائقة، بينما الإناث صوتها هادي جداً و معندهاش نفس القدرات الصوتية مثل الذكور

ممكن يتعلم الكلام أو تقليد الأصوات؟  

ممكن، لكن مش كل الكواكتيل بيتكلم. الكوكاتيل له قدرات صوتية جميلة  و عنده قدرة هائلة مش بس في تقليد الأصوات لكن كمان يقدر يجمع بين أصوات  مختلفة و يصنع نوت غنائية خاصة به. و  تقدر تعلمه يصفر مقاطع موسيقية و كمان بعض الكلمات، لكن الكلمات مش بتكون واضحة
لكن عشان دا يحصل لازم تكون بتدي الطائر وقت يومياً للتدريب و تهتهم به بشكل صحيح بحيث انك تبني رابط قوي بينك و بينه و تعزز ثقة الطائر فيك و بالتالي هيعتبرك فرد من أفراد السرب

:الفرق بين ذكر و أنثى الكوكاتيل

بالنسبة للفرق بين الذكر و الأنثى من المظهر الخارجي فهناك بعض الفروقات البسيطة البتظهر بعد نضوج الطائر، ولكن غالباً بيكون من الصعب على المربي العادي انه يعرف يفرق بينهم… طيب ازاي اعرف احدد الفرق بسهولة؟
هناك اختلافات كثيرة بين سلوكيات ذكر و انثى الكوكاتيل لكن هعرفكم عن كل الاختلافات الجسمانية و السلوكية بالتفصيل في مقال اخر قريب ان شاءالله

:الأنواع و طفرات الألوان

تختلف مسميات و تصنيف الكوكاتيل في السوق حسب طفرة اللون، و فرق الأنواع بيختلف فقط في الألوان حسب رغبة كل شخص، لكن ملهاش هلاقة بشخصية أو مواصفات الطائر. و بالنسبة للشخص العادي الحابب يربي في البيت، هتروح عند المحل و تختار اللون و الطفرة التحبها او الطير الهيتعلق قلبك به.. لكن لو حابب تعرف أكثرعن مسميات الكوكاتيل و ألوانه المختلفة بالصور، ان شاءالله هنتكلم عليها قريب في مقال منفصل

 

الكوكاتيل طائر حساس و يتعلق جداً بصاحبه

قد يصل متوسط عمره الى 20 سنة، فمينفعش تشتريه بشكل عفوي منغير ما تكون متأكد انك هتقدر تتحمل مسئوليةّ اقتنائه و رعايتها بشكل صحيح طول فترة حياته

كيف تختار الطائر و تتأكد من سلامته؟

لو انت مبتدئ في تدريب الطيور بشكل عام، يفضل تشتري كوكاتيل يكون مفطوم يدوي أو تربية من بيت، لأنه بيكون أسهل كثير في التدريب و تعلم الثقة في صاحبة، و بشكل عام الذكور بتكون أسهل في التدريب أو التأليف

:اهتم بالتفاصيل

اختار زغلول (صغير) مفطوم

كل ما يتربى الطائر و يتعود عليك في سن صغير هيكون أسهل ترويضة و تدريبة

راقب الطائر و حاول تختار واحد نشيط، حركته سريعة، وميكنش مستقر فيقاع القفص

لأن طبيعة الطيور بتخبي تعبها لحد متصل للمراحل الأخيرة، عشان كدا اختار طائر نشيط و بيتحرك كثير. بيطير من عصل لعصا، و رد فعله سريع. لكن لو حسيت ان الطائر نافخ نفسه, حركته بطيئة و مستقرفي  قاع القفص، دا معناه ان في احتمالية ان الطائر تعبان

ريش الطائر

الريش الصحي دليل على صحة الطائر و اهتمام و رعاية صاحبه له. و العكس صحيح
كل ما  ريش الطيركان  جميل، متساوي و الوانة ناصعة، بيكون دليل على صحته. و تأكد من عدم وجود أي بقع صلع بريش الطائر

.تأكد من سلامة منقار و أرجل الطائر

تتميز رجل الببغاء بوجود 4 صوابع. 2 أمامية و 2 خلفية
تأكد ان ميكنش في أي اعاقات بالمنقار و الأرجل و الأظافر. و تأكد ان ميكنش في قشورعليهم

العين؛ 

 تكون مفتوحة و صافية

نوع و نظافة الأكل و المياه، و القفص الموجود فيه الطائر؛

فطبيعي دول أكثر حجات تبين مدى الاهتمام و بالتالي صحة الطيور

و بشكل عام عند شرائك لأي نوع طائر؛ 

حاول دائماً تسأل قبل الشراء و تتأكد من أمانة التاجر و حسن معاملته لكل الحيوانات العنده. و حاول تشتري من مربي، مش من بائع عادي لو متاح. عشان تكون متطمن على صحة الطائر، و تتأكد انه مدرب و مش بيخاف من البشر
تأكد أن الطائر تربية مش صيد. لأن الطيور الصيد مشاكلها كثير جداً جداً، دا غير ان الطائر بيكون مقهور و الحبس شبه تعذيب له. و كمان متشجعش على هذا النوع من التجارة لأن للأسف معظم البائعين بيتعاملوا مع الطيور كتجارة و طيور الصيد بتكون سعرها أرخص. و الطيور بتتبهدل و كثير حالتهم بتكون صعبة جداً

مهم جداً

لو عندك طيور أو اي حيوانات اخرى في البيت، انك تفصل بينهم تماماً في الفترة الأولى من استقبال الطائر الجديد، لحد ما تتأكد ان الطائر بخير و معندوش أي أمراض ممكن تعديلك الباقي

:الرعاية و العناية بالطائر

لما تفكر في تربية أي حيوان متفكرش في كيفية بقاء الحيوان علي قيد الحياة و بس
لازم نفكر أكثر ازاي نسعد الحيوان دا و نعطيه الأشياء الكان هيقدر يخذها في حياته البرية قدر المستطاع، ليستخدم فطرته و قدراته الكامله زي ما ربنا قدرله و هيأه. فكردائماً ازاي تمنحه أفضل قيمة لحياته، اعطيه حق الاختيار و ادرك انك بتتعامل مع روح لها احتياجات و مشاعر… فتعلم كيف تكسب ثقة هذا الحيوان أو الطائر الانت اخترت انك تشيل مسئوليته، و لا تعتذر عن المسئولية، ولو حكمت ظروفك، اوعى تتخلى عنه لأي حد. متسبوش إلا لحد فعلاً هيراعي ربنا فيه

:التفاعل مع الببغاء و الطيران خارج القفص

يحتاج الكوكاتيل للكثير من الاهتمام و التفاعل

و بالأخص لو هتجيب طائر واحد بدون رفيق لأنه اجتماعي جدا زي ما قلنا و بيرتبط بصاحبه جدا و بيحب يشاركه و يقلده في كل حاجة. لأن الطيور في الطبيعة بتعيش في سرب، و بتشارك بعض في كل حاجة من أول ما بتصحى لحد ما تنام. فا انت لما بتجيب الطائر البيت و بيبدأ يثق فيك بيعتبرك فرد من أفراد عيلته أو السرب بتاعه، و بيبقا عايز يعمل معك كل حاجة. يعني لو هو خارج القفص و انت بتشرب كباية مياه ممكن جداً تلاقيه جه و عايز يشرب معك من نفس الكوب 

ببغاء الكوكاتيل من الطيور الذكية جدا، و بسرعة بيتعود على صاحبه و بيتعلم روتين حياتك اليومية و بيأقلم نفسه عليها. فا لو هتغير روتينك فجأة كمان لازم تحاول تخلي التغيير دا تدريجي على الطائر و تحطه دائماً في اعتبارك

طرق التفاعل و اللعب مع الكوكاتيل كثيرة و تحتاج مقاة منفصلة هعلمكم فيها ازاي تدربوه و ازاي يثق فيكم بسرعة و فوائد تدريب الطيور بشكل عام، لكن باختصار بسيط دلوقتي هقولكم أكثر الأشياء البيحبها هي الأشياء المتعلقة بالصوتيات زي انك تتكلم معاه كثير و تغنيله و تصفرله و تسمعه أغاني. أيوا سمعه أغاني متستغربش، الكوكاتيل بيحب الموسيقى جدااا و بيحب يقلدها و يرقص عليها كمان و يألف و يزود عليها مقاتع من ابتكاره و بالأخص ذكر الكوكاتيل.

مهم جداااً انك تعطي الطائر مساحة للطيران خارج القفص لمدة ساعة على الأقل يومياً مهما كان حجم القفص، و من اأفضل أن يقضي الكوكاتيل يومه بالكامل خارج القفص أو اكثر عدد من الساعات حسب ظروفك معدى وقت نومه

قلة الطيران تسبب مشاكل كثير جداً صحية و نفسية لجميع أنواع الطيور زي الاستسلام و الاكتئاب، و السمنة و مشاكل في النظام التنفسي، عشان كدا للأسف معظم الناس البتربي طيور بتتفاجئ بموتها خلال عام أو اثنين.، متخيلين خطاً ان دا متوسط عمرهم.
و من الأهم الأشياء انه لازم لازم يقضي وقت خارج القفص على الأقل ساعة في اليوم و الا هيصاب بالاكتئاب. فا لو انت مش هتقدر تحقق دا سواء معندكش الوقت الكافي أو المكان المناسب، يفضل تفكر في اختيار حيوان أليف ثاني يكون مناسب أكثر لظروفك. فتخيل لو عشت عمرك كله محدود الحركة داخل قفص صغير. و اه أنا بشبهنا بالطيور لأنهم شبهنا أكثر مما نتخيل

لما تيجي تطير الكوكاتيل أو اي طائر متفتحش القفص و تدخل ايدك و تمسكه بالعافية و تطلعه، لأنه كدا هيخاف و مش هيثق فيك و هيكره يطلع من القفص. ببساطة افتحله باب القفص و سيبه يطلع لما يحس انه مستعد

وطبعاً خلي بالك، قبل ما تطيره، لازم تاخد بالك ان الشبابيك مغلقة، و ان مفيش أي حاجة خطر في الغرفة ممكن تئذي الطائر و قريباً في مقالة أخرى هكلمك بالتفصيل عن كيفية الاستعداد لللإستقبال أي طائر بالبيت

:حجم القفص و بعد مسافة السلك

أ. حجم القفص: “الأكبر أفضل

وطبعاً خلي بالك، قبل ما تطيره، لازم تاخد بالك ان الشبابيك مغلقة، و ان مفيش أي حاجة خطر في الغرفة ممكن تئذي الطائر و قريباً في مقالة أخرى هكلمك بالتفصيل عن كيفية الاستعداد لللإستقبال أي طائر بالبيت

“مفيش قفص كبير كفاية… بس أقفاص كثيرة ممكن تكون أصغر من اللازم”
و القاعدة الثابتة عند شراء أي قفص لأي طائر هي؛ أن يكون حجم القفص ضعف حجم الطائر بجناحاته مفرودة

أصغر حجم مناسب لقفص الكوكاتيل كما نصح به المتخصصون للطائر الواحد هو؛ 60.96 سم طول في 45.72 سم عرض. و تتضاعف المساحة كل ما هتزود عدد الطيور يعني متقولش القفص دا كويس و هجيب واحد ثاني و خلاص حتى لو بتخرجهم من القفص، صغر حجم القفص بيسبب مشاكل كثير للطيور زي الاكتئاب مرة ثانية و كمان ممكن يؤدي للعنف و الضرب بين الطيور

round cage warning
تحذير!  تجنب شراء القفص المستدير

بالرغم من انتشاره، الا انه يعتبر ن أسوأ أنواع الأقفاص مهما قالك البائع انه مستورد أو غيره. الطيور بتحتاج لوجود أركان بالقفص. القفص المستدير بيزيد من توترهم و عنفهم بشكل كبير

الطيور بتحب تتجه للأركان عند الشعور بالخوف أو القلق. والقفص الدائري لا يعطيها هذه الفرصة مما يزيد شعورهم بالخوف و التوتر

:ب. بعد مسافة السلك

بعد مسافة السلك في غاية الأهمية. عشان لو المسافة كبيرة أو أوسع من الحجم المناسب للطائر، فا ممكن يزنق راسه بين السلك و لقدرالله يخنق نفسه
بالنسبة للكوكاتيل، فالمسافة التي ينصح بها هي؛
 سم1.5875 – 1.27سم

:اللعب و الحوامل و الستاندات

أنواع الستاندات و اللعب كثيرة و مختلفة، ايه هي أفضل الأنواع البيحبها الكوكاتيل و ازاي تختارها؟

:أ. الستاندات
:أنواع الستاندات المريحة و الصحية لقدم الطائر

للأسف أكثر الستندات المتعارف عليها في بلدنا هي الستندات البلاستك، و العادتاً بتكون أحجامها متقاربة، و سبب انتشارها هو بساطة أسعارها و قلة المعرفة بالمشاكل الصحية المترتبة عليها

الستندات هي ممكن تكون أكثر شئ مهم رعايته في تربية الطيور بعد الاهتمام بالنظام الغذائي. لأنها أكثر حاجة بيقف عليها الطائر معظم اليوم لو مكنش اليوم كله. فلازم الستاندات الهتجبها تكون؛

:أحجامها مختلفة

كي يماثل غصون الأشجار و اختلاف أحجامها… فلو الطائر عاش معظم حياته بيقف على ستندات بنفس الحجم و المادة، و بالتالي نفس حركة قفل القدم حولها. دا بيسب ألم شديد جداً للطائر و ممكن يبدأ يحصله مشاكل لقدمه زي؛ القروح و بعض التشوهات

:مريحة

أفضل أنواع الستندات أو أكثر أنواع مريحة للطيور هي الخشب و الحبال، باختلاف أشكالها و أحجامها و نوعية الخشب المستخدمة

:تجنب الستاندات البلاستيكية قدر المستطاع

زي ما قلتلكم قبل كدا؛ مشاكل الستندات البلاستك كثير، و استخدامها مؤذي جداً لقدم الطائر بالرغم من انتشارها
أولاً؛ غير مريحة تماماً لقدم الطائر و مع الوقت بتسبب مشاكل كثيرة مثل القرح و غيرها كما ذكرت سابقاً

ثانياً؛ معظمها لا يساعد الطائر على برد أظافره

ثالثاً؛ استخدام مادة البلاستك بصفة عامة بتكون عرضة للتفاعل و لم الباكتيرا أكثر، بالذات ان عادتا معظم التجار المعنهمش أمانة بيشتروا أردأ الأنواع
و بما ان الطيور بتحب تعض في الأشياء لبرد منقارها، فتدخل قطع صغيرة جدا من البلاستك في بطنها مما قد يقصف عمر الطائر

فلو اضطررت لاستخدامها، على الأقل خليها أسفل القفص من تحت و خلي الستاند الخشب هو الفي أعلى القفص. لأن الطيور بتمضي معظم الوقت في أعلى القفص إلا لو نزلت للحركة أو الأكل أو غيره

:ب. اللعب
“يعشق الكوكاتيل اللعب اليقدر يكسرها بمنقاره” بس ايه أهمية اللعب؟ و ايه الأنواع الآمنة الممكن تجبهاله؟

اللعب للطيور مش مجرد لعب بالمعنى المتعارف عليه. فمن المفترض انها تعادل أشياء بيعملها و يستخدمها الطائر في الطبيعة، مثل استخدام المنقار في الخشب و استخدام ذكاؤهم في البحث عن الطعام، و أشياء أخرى كثيرة… فأهمية اللعب هي انك تخلي الطائر يستثمر كل قدراته الجسدية و العقلية على أكمل وجه كما  خلقه الله لذلك

في الطبيعة، تستثمر الطيور معظم وقتها في البحث عن الطعام بالطيران من مكان الى مكان و التكسير في الأشجار بمنقارها، البحث عن الحبوب في الأرض، و الفواكه و الخضروات في الأشجار.. ولكن في بيوتنا، كل حاجة بتصلهم جاهزة، فبالوقت لو مجبتش بدائل مشابه و استثمرت من وقتك لتدريب الطائر و تغذية وقته و قدراته و ذكاؤه، بيبدأ يشعر بالاكتئاب و الملل و الإستسلام، و كمان بيحصله مشاكل صحية زي السمنة… كل هذه الأشياء بتؤثر بقوة على صحته

الحاجة أم الاختراع   يعني لو انت مش هتقدر كل شوية تجيب لعب للطائر أو مش لاقي لعب مناسبة تقدر بحاجات بسيطة جداً في البيت تعمله لعب آمنة وسهلة و رخيصة، مثل؛ كرتونة المناديل و الكبيات الورقية و غيرها

:ولكن احترس عند اختيارك الألعاب

.ميكنش فيها ألوان صناعية أوأي كيماويات ضارة و سامة للطائر •
.متبقاش فيها أشياء حجمها صغير و ممكن يبلعها أو تتزنق في بقة أو زوره •
.تجنب المرايات اللعبة •


بالرغم أيضاً من انتشارها بالمحلات، إلا انها بتخلي الطائر في حالة عصبية و بتنرفزه جداً و ممكن يصبح مهووس بها حرفياً، و ممكن فجأة يعضك بدون سبب أو تلاقيه أصبح عنيف و تتغير سلوكيات

الميعاد المثالي لنومه هو من وقت المغرب و حتى طلوع الفجر، و دا التوقيت الطبيعي البتنام و تصحا فيه كل أنواع الطيور في البرية. ولكن في البيوت غالباً دا بيتغير حسب ظروف كل بيت، فا مفيش مشكلة على صحة الطائر طالما انه هياخد كفايته من النوم زي ما اتفقنا 10-12 ساعة متواصلة، و نهيئ الظروف لنومه بمعنى؛ ان وقت النوم مفيش نور في مكان قفص الطائر و يفضل كمان لو فيه أصوات تكون خافته جداً عشان يعرف ينام. و العكس وقت الاستيقاذ بنفتح النور و لازم الطائر يشوف الشمس

  :تنظيف القفص

“الطيور كائنات فوضوية جداً – يجب تنظيف القفص باستمرار لعدم انتشار الباكتيريا و الأمراض”

cleaning bucket
:التنظيف اليومي الروتيني

أ. تغيير المياة كل يوم و غسل المشربة جيداً من الداخل بمياه فقط، أو مياه و خل

لأن المياة الراكدة بتكون بكتيريا و فطريات. و هتلاقي دائما و انت بتغسلها احساس بشئ لزج و هيدي بتكون الباكتيريا المكونة بالداخل
.فلازم تغسلها و تمليها تاني بمياه نظيفة مفلترة

 ب. تنظيف أو تبديل طبق الطعام، والتأكد من وجود الطعام الكافي و تنظيفة من أي بقايا من وسخ الطيور ان وجد منعا لانتشار الأمراض و الباكتيريا

ج. تغيير الفرش في قاع القفص، أنا شخصياً بفضلا استخدام مناديل المطبخ السميكة في القاع فوق السلك، بالطريقة دي بيكون التنظيف اليومي سهل جداً بمجرد انك تشيل المناديل القديمة و تقوم بتغييرها

تحذير بلاش تستخدم ورق الجرنال في القفص؛ لأن الطيور كائنات حساسة جداً و الحبر في ورق الجرنال بيسبب تسمم و مشاكل تنفسية للطيور، و كمان الطيور أحيانا ممكن تعض في الورق كنوع من اللعب و تبلعه بالغلط و دي مشكلة خطيرة

 تحذير!  بلاش تستخدم الصابون في تنظيف القفص أو أي منظفات كيماوية؛ سامة و مميتة… حتى لو غسلتها كويس جداً فالمواد دي بتترك بقيا احنا مش بنشفها بعينا
استكمل القراءة لتعرف المواد الطبيعية الآمنة لتنظيف القفص و التخلص من الباكتيريا و الأوساخ

:التنظيف العميق

يفضل ان تقوم بالتنظيف العميق للقفص مرة كل شهر بشكل عام… أكثر أو أقل حسب شعورك بإحتياج القفص لذلك

لأن المياة الراكدة بتكون بكتيريا و فطريات. و هتلاقي دائما و انت بتغسلها احساس بشئ لزج و هيدي بتكون الباكتيريا المكونة بالداخل
.فلازم تغسلها و تمليها تاني بمياه نظيفة مفلترة

:عشان تنظف القفص بعمق…هتحتاج
بخاخة –  مياه ساخنة – خل – ليمونة – ليفة جديدة

.شيل كل حاجة من القفص؛ اللعب و الستدات و أطباق الأكل و المياة
باستخدام البخاخة و الليفة، اغسل و نظف كل اللعب و الأطباق و قم بتنشفهم بفوطة أو اتركهم ينشفوا – يفضل في الشمس

نظف القفص جيداً بالليفة و البخاخة، و قم بتنشيفه فوراً عشان ميصديش. و بعد كدا، رجّع كل شئ في مكانه داخل القفص

في حالة وجود بيض بالعشة
 قم بتنظيف القفص بفوطة مبلولة، و بعد كدا نشفه بفوطة ثانية، منغير ما تلمس العشة أو تحركها «

bathtub

:الاستحمام

لوالقرأ المقال السابق عن تربية و رعاية البادجي الاسترالي، هتلاقي ان كلامي عن الاستحمام تقريباً هو هو
الكوكاتيل مثل البادجي موطنه الأصلي استراليا، و المياة أو الاستحمام مهمين جداً بالنسبة لهم عشان بتهدي البودرة العلي جسمهم و ريشهم و بتساعدهم على تنظيف و تقليم الريش. غير انها في الحر بترطب جسم الطائر

لوالقرأ المقال السابق عن تربية و رعاية البادجي الاسترالي، هتلاقي ان كلامي عن الاستحمام تقريباً هو هو

و لو قدرت تكتشف أكثر طريقة طائرك بيفضلها للاستحمام، هتستمتع بجد و انت بتتفرج عليه و تشوفه و هو بيلعب اد ايه فرحان و بتحس بعدها انه فعلاً مرتاح و ريشة نظيف و لونة اختلف

في ناس هتقولك حميه كل 4 أيام، و البعض بينصح بأقل أو أكثر
الحقيقة هي ان مفيش اجابة محددة، لأنن عدد مرات الاستحمام و الطريقة المستخدمة، هتعتمد على حجتين؛ أولاً، درجة حرارة الجو، و ثانياً شخصية و تفضيل طائرك الخاصة. أهم حاجة انك تحميه الصبح و في مكان مشمس خاصاً في الجو البارد

طيب ازاي احميه؟

:في 4 طرق ممكن تحمي بيها الطائر، و دورك انك تجرب كل الطرق و تشوف أكثر طريقة يفضلها الطائر بتاعك

:أ. باستخدام زجاجة رش أو بخاخة

معظم طيور البادجي بتحب جداً هذه الطريقة؛
املأ الزجاجة بمياه مفلترة فاترة. و قم برش الطائر بهدوء. لو بدأ الطائر يرفرف بجناحة، و يقلب نفسه بالماء و  حاول الاقتراب من الزجاجة فا دا يعني انه مبسوط و مستمتع جداً، و انت نفسك هتستمتع و انت بتتفرج عليه

لكن لو لقيته بدأ يطير بعيد عن مصدر المياه و حاول يهرب منها يبقا توقف قليلاً، و حاول مرة أخرى، لو فضل يهرب يبقا وقف و المرة القادمة جرب تستخدم أحد الأساليب الأخرى، و تذكر دائماً أن علاقتك مع الطيور هي علاقة ثقة متبادلة. فمتتجبرش الطائر على فعل أي شئ بالغصب أو القهر أبداً

:ب. استخدام طبق المياة التقليدي

.فقط املأ طبق من أطباق الأكل شوية صغيرة من المياه، و خذ بالك ميكنش عميق عشان ممكن الطائر يقع فيه و يغرق نفسه فا دائماً احترس.  و ممكن تحط شوية بقدونس في المياه. هتلاقي الطيور بتشرب من الطبق و بتنزل ديلها و جسمها في المياة و بتغني و مستمتعة جداً

:ج. استخدام الحنفية المفتوحة

الطريقة دي برجحها أكثر بعد ما تكون الطيور ولفت عليك
خذ الطائر عند الحوض بعد التأكد من انك شلت أي شئ ممكن يكون خطر عليه… اغلق الحوض بالسدادة و افتح الحنفية و خلي المياة فترة

:د. استخدام بعض الخضرة المبلولة

بالضبط زي ما قرأت. هتغسل الخضرة، سواء كانت بقدونس أو جرجير أو غيره. و تحطهم مبلولين فوق القفص أو في أي مكان في القفص بحيث ان الطيور تقدر تقف عليه. مفيش طائر مش بيستمتع بالإستحمام بهذه الطريقة… هتلاقيه بيقلب نفسه في المياه و يفرفر جناحة و يتقلب و شكلهم بيكون مضحك جداً

 حاجات ممكن تشوفها بسيطة جداً، بس بتسعد الطائر و بتحافظ عليه و على حالتة الصحية و النفسية، فجرب كل الطرق و راقب طيورك و اعرف كل واحد فيهم بيفضل ايه

:النوم

 يحتاج الكوكاتيل من 10-12 ساعة من النوم المتواصل يومياً
قلة النوم بتأثر صحة الطائر العامة و كمان بيأثر جداً على مزاجهم و سلوكياتهم، زي أي كائن حي بما فيهم احنا البشر لو منتش كويس بتتعب و ممكن تنزعج جداً من أبسط الأشياء

:أشياء يجب مراعتها وقت النوم

لازم يكون المكان هادئ و مظلم وقت النوم لكي يستطيع الطائر انه ينام
بعض الناس بتنصح بتغطية القفص وقت النوم، لكن بخبرتي الشخصية ان الطريقة دي مش بتتناسب مع كل الطيور، يعني فيه طيور بتشعر بالأمان لما بنغطي القفص بالليل و علي العكس فيه طيور ممكن يحصلها ذعر و بتخاف جدا منه. فا دي نقطة ترجع لطبيعة و شخصية الطائر بتاعك.
مع مراعاة عدم تغطية القفص في الصيف عشان الحر و قلة الهواء ممكن تخنق الطائر لقدر الله

  :الطعام و الشراب، و النظام الغذائي للكوكاتيل

يعتمد النظام الغذائي للكوكاتيل على أنواع مختلفة من البذور و الفاكهة و الخضراوات. للأسف ناس كثير بتستسهل تقديم البذور فقط للببغاء الشئ البيخلي الطائر عرضة لمشاكل صحية كثيرة و بيقصف عمره. فا لازم نقدمله دائماً نظام غذائي متوازن. و ان شاءالله هكلمكم عن النظام الغذائي للكواكتيل بالتفصيل في مقال آخر

شكراً لمتابعتكم و أتمنى أكون قدرت أفيدكم… لو عندك أي أسئلة، متترددش انك تبعتلي و أنا هحاول دائماً أرد على كل الأسئلة... هتلاقوني دائماً موجودة للرد على اسئلتكم على صفحة الفيسبوك أو انستجرام
و لو حابب تتابعني و تعرف نصائح مختلفة عن تربية حيواناتك الأليفة و تتابع كل المقالات الجديدة، اضف بريدك الالكتروني و انضم لنا  أو تابعني  على صفحة الفيسبوك و بينتريست و اينستجرام


موضوعات أخرى

About Us

I started this blog because I wanted to create a community for animal lovers, and hopefully my experience would help you guys with every little aspect about your Furry and Feathered friends; from training, to communication, health, diet and much more.

More About Us

تواصل معي

  • Petsoholic@gmail.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s